Gunnur Helga­dóttir ráðin for­stjóri Hrafnistu

Þetta kemur fram í tilkynningu. Þar kemur fram að Gunnur hafi starfað hjá Hrafnistu frá árinu 2020. Þar áður var hún framkvæmdastjóri lyfjafyrirtæksins Vistor í nærri tíu ár. Hún er með MBA-gráðu frá Háskólanum í Reykjavík og BS-próf í hjúkrunarfræði frá Háskóla Íslands. Gunnur hefur auk þess víðtæka stjórnunarreynslu og starfsreynslu sem hjúkrunarfræðingur.

„Við erum afar ánægð með að Gunnur taki við starfi forstjóra Hrafnistu til framtíðar. Hún þekkir starfsemi okkar vel og getur því strax stigið inn í mikilvæg verkefni. Auk þess sem hún býr yfir öflugri blöndu af faglegri þekkingu og stjórnunarreynslu. Fram undan eru mikilvæg verkefni í uppbyggingu og þróun öldrunarþjónustu og við höfum fulla trú á að Gunnur muni leiða Hrafnistu af krafti inn í næsta kafla,“ segir Aríel Pétursson, stjórnarformaður Sjómannadagsráðs, í tilkynningu.

„Ég tek við starfinu af mikilli tilhlökkun og metnaði. Hrafnista býr yfir mikilli þekkingu og öflugu starfsfólki. Ég hlakka til að vinna áfram með þessum góða hópi að því að þróa þjónustuna og skapa íbúum okkar öryggi, traust og vellíðan,“ segir Gunnur.

Í tilkynningunni kemur fram að Hrafnista er stærsti rekstraraðili hjúkrunarheimila á Íslandi og rekur sex hjúkrunarheimili á höfuðborgarsvæðinu og eitt á Reykjanesi. Meginmarkmið Hrafnistu sé að veita framúrskarandi þjónustu þannig að íbúar, aðrir þjónustuþegar og aðstandendur upplifi öryggi, traust og vellíðan. Hrafnista sé óhagnaðardrifið dótturfélag Sjómannadagsráðs og saga starfseminnar nær aftur til ársins 1957 þegar Hrafnista í Laugarási tók til starfa.