„Fólk er bara slegið“

Niðurstöður nýjustu PISA-könnunarinnar voru birtar í gær og hefur árangur íslenskra nemenda aldrei verið í jafn slæmur. Inga Sæland mennta- og barnamálaráðherra ræddi útkomuna í Reykjavík síðdegis í gær og talaði þar meðal annars um leikskólana og sagði að taka þyrfti utan um börnin fyrr.

„Það eru rosalegar áskoranir sem mæta okkur í leikskólanum þar sem stór hluti af þeim sem eru að sinna börnunum okkar tala ekki íslensku. Þetta er á viðkvæmum tíma sem börnin okkar eru að læra tungumálið,“ sagði Inga meðal annars í Reykjavík síðdegis í gær.

Linda Ósk Sigurðardóttir formaður svæðadeildar leikskólakennara í Reykjavík segir þó að á leikskólunum starfi mjög gott erlent starfsfólk þá séu orð ráðherra rétt.

„Það hefur verið litið svolítið á það þannig í gegnum tíðina að það sé gott að fara að starfa á leikskóla til að læra íslensku. Sem er náttúrulega alls ekki vegna þess að við erum að vinna með börn og leggjum mikla áherslu á málþroska í leikskólanum,“ sagði Linda í hádegisfréttum Bylgjunnar.

Fjölgar í leikskólakennaranámi

Hún segir að fjölgað hafi í hópi þeirra sem sækja um leikskólakennaranám sem sé jákvætt. Menntaðir kennarar haldi leikskólunum uppi og séu þeir sem haldist lengst í starfi.

„Í Reykjavík hefur verið unnið mjög ákveðið að því að fjölga leikskólakennurum. Það höfum við til dæmis gert með því að hvetja starfsfólkið hjá okkur til að sækja um nám og þau hafa þá fengið nokkurs konar námsleyfi. 

„Hér á mínum leikskóla erum við með nokkra sem eru að fara í mastersnám sem eru með aðra háskólamenntun.“

„Við erum alvöru kennarar“

En það voru önnur orð Ingu um leikskólakennaranámið sem hafa farið fyrir brjóstið á leikskólakennurum.

„Það vantar meiri hvata til að fá fleiri til að læra. Komið þið með, lærið að verða leikskólakennarar og alvöru kennarar og takið utan um börnin með okkur,“ sagði Inga á Bylgjunni í gær.

Linda segir að hún myndi vilja að ráðherra talaði af virðingu um sitt starf og að reglulega hafi verið rætt að tala þurfi leikskólann upp. Þessi orð geri það ekki.

„Fólk er bara slegið af því að svona eigum við ekki að tala um starfstéttir. Við eigum ekki að vera að gera minna úr starfstéttinni okkar þó svo að við kennum minna fólki, litla fólkinu. Við erum alvöru kennarar.“