Sökk í þriðja sinn í höfninni

Guðmundur Fylkisson lögreglumaður og stjórnarmaður í Hafnarfjarðarhöfn birti mynd af Jökli í morgun. Það var fyrir nánast sléttu ári sem áttatíu tonna trébáturinn sökk síðast en Vísir greindi frá því þann 28. september í fyrra. Þar áður sökk hann í höfninni í ágúst árið 2020. 

„Þetta er gamall bátur og það hafa verið dælur um borð, því þarna er yfirborðsvatn en síðan hefur þetta seitlað bara hægt og bítandi inn,“ segir Guðmundur í samtali við Vísi. Hann segir að til hafi staðið að farga bátnum á næstu dögum en báturinn var smíðaður í Þýskalandi árið 1959 og hefur staðið óhreyfður í höfninni undanfarin ár.

Guðmundur segir að líklega muni báturinn liggja á botni við höfnina út daginn í dag. Það sé eigandanna að ná honum upp.