Strákarnir á Saga Class en stelpurnar aftar í vélinni

„Útskýringin er einfaldlega sú að það var bara mjög erfitt að finna pláss í þessari flugvél,“ segir Þórarinn Már Þorbjörnsson, framkvæmda- og íþróttastjóri Keilusambands Íslands, í samtali við Vísi. „Það bara var svoleiðis og það er alls ekki verið að mismuna milli karla og kvenna. Það er bara ekki til í mínum huga.“

Vísi barst ábending í morgun þess efnis að í morgun á Keflavíkurflugvelli hafi komið í ljós að liðsmenn úr karlalandsliði Íslands sætu á Saga Class, með öllum þeim fríðindum sem því fylgja fyrir flug og meðan á því stendur, á meðan liðsmenn kvennalandsliðsins hafi fengið sæti á almennu farrými. Fram undan er mót á Írlandi og keppa tólf keppendur fyrir Íslands hönd og með í för eru þrír þjálfarar.

„Mér sárnar svona“

Samkvæmt ábendingunni hafi þetta skiljanlega ekki farið vel í liðsmenn kvennalandsliðsins sem hafi liðið eins og „annars flokks fólki“.  Það ku samt ekki vera rétt að allir leikmenn karlalandsliðsins hafi verið á Saga Class.

„Þegar verið er að fara í svona ferðir snýst þetta alltaf um hvar eru til miðar í flugvélinni. Þegar við ferðumst þurfum við alltaf að kaupa aukabúnað og aukatöskur og þess háttar. Þegar verið er að kaupa flugmiða þá verður maður alltaf að vega og meta hvar við fáum besta, hagstæðasta verðið, því að hver taska kostar sitt. Þetta snýst heldur ekki bara um karlalandsliðið vegna þess að stærsti hluti karlalandsliðsins flýgur frá Svíþjóð. Þannig að þetta eru örfáir einstaklingar.“

Búið hafi verið að kaupa alla flugmiða fyrir kvennalandsliðið löngu áður þar sem búið var að velja í liðið á undan karlalandsliðinu.

„Þegar það svo gerist þá er bara uppselt í flugið nema á Saga Class og við erum að tala um tvo karlmenn af þremur. Það er ekki verið að mismuna eftir kynjum, það er bara ekki svoleiðis. Þetta er alls ekki, langt í frá, gert með þeim hætti að verið sé að mismuna fólki. Mér sárnar svona. Þetta er í fyrsta skipti sem ég lendi í því að það sé nánast uppselt í flug.“

Með sæti á Saga Class fylgi tvær innritaðar ferðatöskur. Það hafi verið tekið með í myndina því landsliðin í keilu ferðist með mikinn búnað á mót erlendis. Leiðinlegt sé að tal um mismunun milli kynja komi upp í þessu máli.

„Því það er ekki okkar tilgangur að vera í einhverju slíku. Við fengum einn miða þarna aftar í vélinni. Sá miði er dýrari því hann var valinn aðeins seinna. Það datt einn liðsmaður út og annar gripinn inn í kjölfarið. Sá miði er dýrari heldur en sá sem var keyptur á Saga Class vegna þess að það var bara orðið nánast uppselt í vélina og Icelandair er ekkert að slá af verði þó að við séum íþróttafólk.“