„Við erum Haukar og við horfum alltaf bara á toppinn“

Haukar voru með yfirhöndina nánast allan leikinn og leiddu með fimm mörkum þegar um fjórar mínútur voru eftir. FH-ingar náðu þó að minnka muninn niður í eitt mark og fengu tækifæri til að jafna metin á lokasekúndunum, en Grétar Ari rauk út af marklínunni og slökkti í vonum FH-inga.

„Þetta var óþarflega tæpt, en mér finnst þessir Hafnarfjarðarslagir alltaf enda í einhverri svona vitleysu. En mér finnst þetta líka bara eðlilegt að þetta endi í svona. Á meðan við sigrum er mér svo sem alveg sama hvernig það gerist,“ sagði Grétar Ari í leikslok.

Grétar Ari hefur oft sýnt betri frammistöðu en hann sýndi í fyrri hálfleik í kvöld, en hann kom sterkur inn í seinni hálfleikinn og varð að lokum hetja Hauka.

„Markvarslan var ekki frábær í fyrri hálfleik. Hún var bara mjög léleg. En þetta er bara hlutfall líka. Ef þú kastar peningi upp í loftið þá eru helmingslíkur en þú getur samt fengið hann fimm sinnum í röð á sömu hliðina. Mér fannst Jón Þórarinn (markvörður FH) alveg vera að gera vel og mér fannst ég alveg vera að gera vel. Þetta var bara einhvernveginn að leka í gegnum okkur. Það voru fullt af boltum sem við vorum að snerta, en svona er bara lífið í markinu,“ sagði Grétar.

„Þarna í lokin. Þetta var náttúrulega bara úrslitaskot og mér fannst hann hoppa svolítið nálægt markinu þannig ég ákvað að hoppa bara út á móti og vonast til að pressan væri það mikil að hann myndi ekki ná að sjá markið og ekki sjá hvað ég væri í raun kominn nálægt honum. Það virkaði í þetta skiptið. En það hefur líka klikkað hundrað sinnum.“

Eftir sigurinn eru Haukar með fullt hús stiga á toppi deildarinnar eftir fjórar umferðir. En hvert er liðið að stefna á tímabilinu?

„Það er náttúrulega mjög stutt búið af mótinu. En við erum Haukar og við horfum alltaf bara á toppinn. Það er krafa um það. Hvort það takist eða ekki er svo bara annað mál,“ sagði Grétar.

„Við vitum alveg að það er stutt á milli í þessu. Við áttum til dæmis leiki í fyrra þar sem við unnum Val með 11 mörkum og svo töpum við næsta leik á móti ÍBV heima. Við erum að reyna að finna þennan stöðugleika og hingað til hefur það gengið. Við erum áfram á tánum,“ sagði Grétar að lokum.