Iceguys beint á toppinn og ís­lenska bíóárið mallar

Strákahljómsveitin Iceguys, sem samanstendur af Aroni Can, Herra Hnetusmjöri, Rúrik Gíslasyni og bræðrunum Friðriki Dór og Jóni Jónssyni, sendi frá sér þrjár sjónvarpsseríur á árunum 2023 til 2025 á Sjónvarpi Símans. Þeir bundu endi á sögu sveitarinnar með kvikmyndinni Iceguys: The Movie sem var frumsýnd 30. október síðastliðinn. 

Sjá einnig: Barnaefni fyrir fullorðna

Kvikmyndin fjallar um það þegar sveitin ætlar á tónleikaferðalag að hita upp fyrir Backstreet Boys en villist inn í alþjóðlega strákasveitakeppni. Auk ísgauranna fimm fara Sandra Barilli, Ólafía Hrönn Jónsdóttir, Salóme Gunnarsdóttir og Sólmundur Hólm með hlutverk í myndinni. Leikstjórn myndarinnar er í höndum Hannesar Þórs Halldórssonar, Allans Sigurðssonar og Hannesar Arasonar.

Eftirspurnin eftir Iceguys-strákunum er töluverð því alls fóru 6.591 bíógestur að sjá myndina sem var sýnd í tíu bíósölum um helgina og skilaði hún því rúmum fimmtán milljónum króna í kassann. Strákarnir hrifsuðu um leið toppsætið af líkamshrollvekjunni Clayface sem rúmlega fjögur þúsund manns eru búnir að sjá.

Tónlistarmyndir á toppnum

Samkvæmt aðsóknartölum frá Alfreði Ásberg, framkvæmdastjóra Sambíóanna, hafa tæplega 35 þúsund gestir séð nýjar íslenskar kvikmyndir í bíó í ár. Þá eru ótaldir gestir á sérsýningar og afmælissýningar sem nema yfirleitt nokkrum þúsundum.

Að sögn Alfreðs eru íslenskar kvikmyndir ekki nema fimm prósent af heildaraðsókn en þegar best hefur látið hefur sú tala verið í kringum tólf til fimmtán prósent.

Vinsælasta íslenska kvikmyndin það sem af er ári er söngvamyndin Hvar er draumurinn? í leikstjórn Höskuldar Þórs Jónssonar en rúmlega ellefu þúsund manns fóru að sjá hana í haust. Eftir aðeins eina helgi í bíóhúsum er kvikmynd ísgauranna komin með um tvo þriðju af aðsókn toppmyndarinnar og þarf sennilega ekki nema aðra helgi til að skáka henni.

Alfreð Ásberg á von á því að Iceguys: The Movie muni verða langvinsælasta kvikmynd ársins og gengur svo langt að spá því að hún muni gera enn betur en síðasta leikna kvikmyndin frá Hannesi Þór Halldórssyni, Leynilögga, sem rúmlega 41 þúsund manns sáu árið 2021.

Sjá einnig: Reimleikar í húsinu eða röskun í heilanum?

Þriðja sætið vermir hrollvekjan Röskun eftir Braga Þór Hinriksson með rúmlega sex þúsund gesti. Eftir rúman mánuð í kvikmyndahúsum í vor þá fór hrollvekjan á streymisveituna Sjónvarp Símans þar sem hægt var að horfa á hana í fjórum þáttum.

Á hæla Röskunar kemur heimildarmyndin Fuglar og menn eftir Mika Kaurismäki, Ingvar Þórðarson og Ragnar Axelsson sem hefur gert ansi gott mót með um 5.200 gesti. 

Þar á eftir kemur heimildarmyndin Um tímann og vatnið eftir Söru Dosa sem byggir á samnefndri bók eftir Andra Snæ Magnason og hefur farið sigurför um heiminn. Um 4.200 gestir hafa farið að sjá hana í íslenskum bíóhúsum. Rúmlega níu þúsund Íslendingar hafa því farið að sjá þessar tvær heimildarmyndir sem hlýtur að teljast ansi gott.

Neðar á listanum eru svo kvikmyndirnar Undir ísnum eftir Kristján Sturla Bjarnason með um fjögur þúsund gesti, Tulipop: Pési prakkari eftir Selinu Wagner með 2.700 gesti og svo loks heimildarmyndin Ferlið hans Bubba eftir Ásgeir Sigurðsson sem um þúsund manns sáu. Inn í talninguna vantar svo aðsóknartölur fyrir kvikmyndina Dimmalimm eftir Mikael Torfason.

Bransinn uggandi

Íslenskir kvikmyndagerðarmenn hafa verið uggandi undanfarin misseri, lýst yfir neyðarástandi og „áratuga afturför“ í greininni, flótta reynslubolta og frosti hjá Kvikmyndasjóði sem hefur staðið í stað í þrjú ár og rýrnað miðað við verðbólgu. 

Einungis þrjár leiknar kvikmyndir fengu styrk frá Kvikmyndasjóði á síðasta ári, Eldarnir, Ástin sem eftir er og Víkin og tvær á þessu ári, Röskun og Iceguys: The Movie. Þar eru auðvitað ekki teknir inn í jöfnuna handrits- og framleiðslustyrkir á kvikmyndum sem koma út síðar.

Á síðasta ári fóru rúmlega 47 þúsund gestir að sjá íslenskar kvikmyndir (að meðtöldum sérsýningum og afmælissýningum) í bíóhúsum samanborið við rúmlega 102 þúsund gesti árið 2024 og um 147 þúsund gesti árið 2023. 

Heildartekjurnar í fyrra námu rúmum 87,5 milljónum króna miðað við 212 milljónir króna árið áður og 287,7 milljónir árið 2024. Þegar aðsóknartölurnar eru skoðaðar fimm ár aftur í tímann sést hvernig aðsóknina batnaði eftir Covid og náði hámarki árið 2023 en hefur dregist saman síðan.

Aðsókn á íslenskar myndir aftur í tímann

• 2020 - 69.586 gestir
• 2021 - 85.406 gestir
• 2022 - 77.662 gestir
• 2023 - 146.577 gestir
• 2024 - 102.451 gestir
• 2025 - 47.388 gestir
• 2026 - ?

Mest sótta kvikmyndin árið 2025 var Eldarnir en hana sáu fimmtán þúsund gestir og þar á eftir komu Ástin sem eftir er og Guðaveigar með í kringum 7.500 gesti hvor. 

Toppmyndirnar árið 2024 voru allar betur sóttar en Eldarnir, tæplega 45 þúsund manns fóru að sjá Snertingu, rúmlega 17 þúsund sáu Ljósvíkinga og um tvö hundruð færri sáu Fullt hús. 

Aðsóknin á íslenskar myndir árið 2023 er hálfmögnuð í baksýnisspeglinum en þá fóru um 56 þúsund manns að sjá Villbráð og á eftir henni komu Kuldi og Napóleonsskjölin með tæplega 30 þúsund gesti hvor.

Aðsókn á íslenskar myndir í ár á enn nokkuð í land með að ná síðasta ári en miðað við aðsóknina á Iceguys: The Movie er líklegt að það gerist í þessum mánuði. En jafnvel þó að bjartsýnar spár gangi eftir og ísgaurarnir dragi meira en fjörutíu þúsund gesti í bíó er ólíklegt að aðsóknin í ár komist nálægt árunum 2023 og 2024.