Fjölskylda Arturs óttast að honum hafi verið gert mein og er ósátt við vinnubrögð lögreglu

Enn hefur ekkert spurst til Arturs Jarmoszko sem lögreglan á höfuðborgarsvæðinu lýsti eftir á fimmtudag. Síðast sást til Arturs rétt fyrir miðnætti í Lækjargötu í miðbæ Reykjavíkur þann 28. febrúar síðastliðinn.

Artur er 26 ára karlmaður frá Póllandi. Hann hefur búið á Íslandi í um fimm ár og býr í Breiðholti. Þá búa tveir bræður Arturs á Íslandi ásamt fleiri fjölskyldumeðlimum. Foreldrar hans búa í Póllandi.

Þriðjudaginn 28. febrúar tók Artur strætó í miðbæ Reykjavíkur. Fjölskylda hans segist hafa fengið upplýsingar um það frá lögreglu að hann hafi tekið út alla þá fjárhæð sem hann átti á reikningum sínum sama dag. Fjárhæðina viti þau hins vegar ekki. Síðast sést Artur svo í eftirlitsmyndavél á Lækjargötu þann daginn. Rúmum tveimur tímum síðar slokknar á síma hans.

Björgunarsveit tilbúin að hefja leit

Lögreglan á höfuðborgarsvæðinu óskaði í dag eftir því að fá upplýsingar úr síma Arturs frá símafyrirtæki hans. Þá hefur hún fundað með Landsbjörgu og eru björgunarsveitarmenn tilbúnir að hefja leit.

Guðmundur Páll Jónsson, lögreglufulltrúi, segir að leitin muni hefjast um leið og í ljós kemur hvar síminn var síðast staðsettur. Það verði líklegast í kvöld eða á morgun. Fyrir þann tíma hafi ekki verið hægt að hefja leit þar sem lögregla hafði engar upplýsingar um hvar Artur var staddur þegar hann hvarf.

„Það voru mjög hræðilegar fréttir að við gátum ekki náð sambandi við hann Artur. Það er mjög erfitt að tala um þetta en við erum í sambandi við mömmu hans sem er úti. Við sendum henni um leið og við vitum eitthvað,“ segir Elwira Landowska frænka Arturs.

Litli bróðir Arturs segist óttast að honum hafi verið gert mein. Fjölskyldan telji að ekki sé möguleiki að um sjálfsmorð sé að ræða.

„Hann myndi aldrei gera það held ég. Hann vildi ferðast og heimsækja vini sína í Kanada. Það er líka óvenjulegt að einhver fari úr Breiðholti niður í miðbæ til að taka út pening,“ segir Robert Jarmoszko bróðir Arturs.

Þá benda þau einnig á að þetta hafi ekki verið um helgi heldur í miðri viku og að hann hafi verið einn á ferð og hversu vel sjáist í Artur á öryggismyndavélum.

Einhver hljóti að vita eitthvað

Fjölskyldan er ósátt með vinnubrögð lögreglu í málinu en eru þó þakklát því að leit sé loks að hefjast.

„Þau lýstu ekki eftir honum strax í byrjun vegna þess að hann er ekki íslenskur svo það skipti ekki jafn miklu máli. Þegar Birna hvarf var hún úti um allt. Það var alls staðar daginn eftir,“ segir Robert.

„Svo er líka það að Ísland er svo lítið og allir þekkja alla þannig það hýtur að vera einhver sem veit eitthvað smá sem getur bent okkur á hann,“ segir Elwira.

Guðmundur Páll segir nánast útilokað að Artur hafi farið úr landi. Málið sé ekki rannsakað sem sakamál hjá lögreglu að svo stöddu en að það sé í algjörum forgangi.

Talið er að Artur sé klæddur í svarta úlpu eða mittisjakka, í bláum gallabuxum og í hvítum strigaskóm. Hann er grannvaxinn, 186 sentimetrar á hæð, með græn augu og stutt, dökkt hár.