Stórleikur í beinni á NBA TV í nótt

Það verður sannkallaður stórleikur á dagskrá NBA TV sjónvarpsstöðvarinnar á Fjölvarpinu í nótt þegar Chicago Bulls tekur á móti Phoenix Suns. Leikurinn hefst klukkan 1:30 að íslenskum tíma og þar má fastlega reikna með fjörugum leik.

Lið Chicago hefur nú hrist af sér erfitt gengi í byrjun leiktíðar og hefur unnið 19 leiki og tapað 12. Liðið hefur þar af unnið síðustu 7 heimaleiki sína og hefur unnið 15 og tapað aðeins 2 leikjum í United Center á leiktíðinni.

Phoenix hefur unnið 21 leik og tapað aðeins 8 á leiktíðinni og vann síðast sannfærandi útisigur á Detroit 108-101 þar sem Steve Nash skoraði 35 stig og Amare Stoudemire skoraði 31 stig og hirti 13 fráköst.