Walker og Posey verða ekki með Miami í nótt

Pat Riley, þjálfari Miami Heat, tilkynnti á blaðamannafundi í beinni útsendingu á NBA TV nú í kvöld að hann yrði ekki með liðinu um óákveðinn tíma vegna aðgerða sem hann þarf að gangast undir á hné og mjöðm. Þetta voru ekki einu tíðindin sem Riley tilkynnti á fundinum.

Riley tilkynnti að framherjarnir Antoine Walker og James Posey yrðu ekki á leikskýrslu hjá liðinu í kvöld eftir að þeim mistókst að koma sér í nógu gott form eins og fyrir þá var lagt fyrir nokkrum mánuðum. Hann sagði leikmennina ekki verða á skýrslu í kvöld vegna þessa, en sagði þá væntanlega verða með í næsta leik. Nái leikmennirnir ekki umsömdu líkamlegu ástandi fyrir ákveðna dagsetningu sem þeim hefur nú verið kynnt, verða þeir báðir sektaðir og settir í bann.

Lið Miami má mjög illa við þessu þar sem bæði Shaquille O´Neal og Dwyane Wade eru meiddir, svo reikna má með því að Miami eigi erfitt verkefni fyrir höndum gegn LA Clippers í kvöld.