Undirmannað lið Miami steinlá á heimavelli

Meistarar Miami Heat eiga mjög erfitt verkefni fyrir höndum á næstu vikum eftir að liðið tapaði enn einum leiknum í nótt, að þessu sinni gegn LA Clippers á heimavelli 110-95. Liðið var án fimm fastamanna og þjálfarans Pat Riley sem þarf að gangast undir aðgerð á hné og mjöðm.

Miami var án Shaquille O´Neal, Dwyane Wade og Wane Simien, sem eru frá vegna meiðsla og veikinda. Þá var liðið án þeirra James Posey og Antoine Walker sem voru settir út úr liðinu eftir að þeim tókst ekki að mæta kröfum liðsins um líkamsform. Posey og Walker verða heldur ekki með liðinu í næsta leik.

Ron Rothstein stýrir liðinu í fjarveru Pat Riley, en hann var þjálfari Miami fyrstu þrjú ár félagsins í deildinni í kring um 1990. Jason Kapono skoraði 19 stig fyrir Miami sem tapaði fjórða leik sínum í röð, en Elton Brand skoraði 28 stig fyrir Clippers og Chris Kaman skoraði 20 stig. Báðir hittu þeir úr fyrstu 5 skotum sínum í leiknum.

Phoenix vann enn einn leikinn þegar það lagði Toronto 100-98 á útivelli. Raja Bell skoraði 19 stig fyrir Phoenix en Chris Bosh sneri aftur í liði Toronto og skoraði 26 stig og hirti 14 fráköst.

Cleveland lagði Boston 107-104 þar sem LeBron James skoraði 32 stig fyrir Cleveland en Tony Allen skoraði 22 stig fyrir Boston. Þetta var sjöundi sigur Cleveland á Boston í röð.

Minnesota lagði San Antonio á heimavelli 103-101 eftir framlengdan leik í beinni útsendingu á NBA TV á Fjölvarpinu. Manu Ginobili skoraði 26 stig fyrir San Antonio en Mark Blount skoraði 28 fyrir Minnesota.

Memphis lagði Golden State 144-135 í fjörugum leik. Matt Barnes skoraði 36 stig fyrir Golden State en Mike Miller skoraði 33 stig fyrir Memphis.

Houston lagði Seattle 103-96 á heimavelli sínum. Tracy McGrady skoraði 31 stig fyrir Houston en Ray Allen 32 fyrir Seattle.

Utah lagði Philadelphia 98-87 þrátt fyrir hörmulega hittni. Carlos Boozer skoraði 27 stig og hirti 14 fráköst fyrir Utah en Andre Miller skoraði 17 stig fyrir Philadelphia sem hefur verið á keppnisferðalagi síðan á annan dag jóla.

Loks vann New York góðan útisigur á Portland 99-81 þar sem Eddy Curry skoraði 27 stig fyrir New York en Zach Randolph skoraði 15 stig fyrir Portland.