Brown verður ekki sóttur til saka fyrir tertukast

Lögregluyfirvöld í Los Angeles hafa ákveðið að aðhafast ekki frekar í máli manns sem segir framherjann Kwame Brown hjá LA Lakers hafa leikið sig ansi grátt um síðustu helgi, en þetta er ekki í fyrsta skipti sem Brown er sakaður um vafasama iðju utan vallar.

Maður að nafni Alexander Martines sagði í skýrslu lögreglu að hann hafi verið á leið heim úr 30 ára afmælisveislu sinni á laugardagskvöldið þegar hann hafi gengið fram á framherjann Ronny Turiaf hjá Lakers og bað Martinez hann um að fá að taka mynd af þeim. Turiaf var hinn kurteisasti og varð við bón afmælisbarnsins. Brown vatt sér þá skyndilega að Martinez, tók af honum flennistóra afmælistertu sem hann hafði meðferðis og grýtti henni í afmælisbarnið. Hann hvarf svo inn í hvíta lúxusbifreið og hvarf.