Langþráður sigur hjá Phoenix - Wade fór hamförum

Tveir leikir fóru fram í NBA deildinni í nótt. Dwyane Wade tryggði Miami góðan sigur á Cleveland og Phoenix vann fyrsta leik sinn í vetur gegn toppliðunum í Vesturdeildinni þegar liðið skellti San Antonio í frábærum leik í beinni á NBA TV.

Dwyane Wade skráði nafn sitt enn frekar í metabækur Miami Heat þegar hann skoraði 24 af 41 stigi sínu í fjórða leikhluta í ótrúlegum 92-89 sigri á Cleveland. Miami var 12 stigum undir þegar innan við 8 mínútur voru eftir af leiknum, en þá tók Wade öll völd á vellinum.

Hann setti annað félagsmet með því að hitta úr 23 af 24 vítum sínum. Þá setti hann reyndar annað vafasamara met með því að tapa 12 boltum - en félögum hans er líklega sama eftir hetjuskap hans á lokamínútunum. LeBron James hafði öllu hægar um sig hjá Cleveland og skoraði 17 stig og gaf 9 stoðsendingar. Hann fór illa að ráði sínu á vítalínunni og klikkaði þar hvað eftir annað á lokamínútunum. Daniel Gibson var stigahæstur hjá Cleveland með 19 stig og þá skoraði Shaquille O´Neal 16 stig fyrir Miami.

Phoenix Suns hafði í gærkvöld tapað öllum 6 leikjum sínum gegn toppliðunum í Vesturdeildinni (Dallas, San Antonio, Utah og Lakers) en leiðrétti þá leiðindaþróun með sannfærandi sigri á San Antonio á heimavelli sínum í nótt 103-87.

Leikurinn var fjörugur eins og flestir leikir Phoenix, en gestirnir frá San Antonio ætluðu að selja sig dýrt eftir tap í Utah kvöldið áður. Amare Stoudemire reyndist þó of stór biti fyrir San Antonio til að kyngja í þetta skiptið og skoraði 24 stig og hirti 23 fráköst. Leandro Barbosa skoraði 25 stig af bekknum hjá Phoenix og Steve Nash var með 13 stig og 11 stoðsendingar. Manu Ginobili var frábær í liði San Antonio og skoraði 32 stig, Tony Parker skoraði 20 stig og Tim Duncan skoraði 20 stig og hirti 18 fráköst.

Þá er rétt að minna NBA aðdáendur á að leikur Indiana Pacers og LA Lakers verður sýndur í beinni útsendingu á Sýn á miðnætti í kvöld.