Kylfusveinarnir tryggðu Liverpool frábæran sigur

Craig Bellamy og John Arne Riise hjá Liverpool komust í heimsfréttirnar á kolröngum forsendum í vikunni en í kvöld voru þeir hetjur liðsins þegar það bar sigurorð af Evrópumeisturum Barcelona á útivelli 2-1 í fyrri leik liðanna í 16-liða úrslitum Meistaradeildarinnar.

Barcelona komst yfir í leiknum með laglegu marki frá Deco á 14. mínútu, en Craig Bellamy jafnaði skömmu fyrir leikhlé. Hollendingurinn Dirk Kuyt eignaði sér heiðurinn að markinu með því að spyrna boltanum í netið, en markið var skráð á vandræðagemlinginn Bellamy. Hann fagnaði marki sínu innilega með því að slá golfhögg ótt og títt út í loftið og uppskar hlátur félaga síns Steven Gerrard.

Það var svo John Arne Riise sem skoraði sigurmark þeirra rauðu á 74. mínútu og það eftir sendingu frá Craig Bellamy. Þetta var ólíkt skárri sending en sá norski fékk á hótelherberginu í Portúgal á dögunum og Liverpool er nú í úrvalsstöðu fyrir síðari leikinn á heimavelli sínum. Eiður Smári spilaði síðustu 10 mínúturnar í leiknum en gat ekki breytt þeirri staðreynd að lið Barca var slakt í kvöld.

Öllum hinum leikjunum í kvöld lauk með jafntefli. Porto og Chelsea skildu jöfn í Portúgal 1-1 þar sem Raul Meireles kom Porto yfir á 12. mínútu en Andriy Shevchenko jafnaði skömmu síðar fyrir Chelsea og þar við sat.

Inter og Valencia skildu jöfn 2-2 í hörkuleik. Cambiasso og Maicon skoruðu fyrir Inter en Villa og Silva gerðu mörk spænska liðsins sem er í lykilstöðu fyrir síðari leikinn á heimavelli.

Loks skildu Roma og Lyon jöfn 0-0 á Ólympíuleikvangnum í Róm.