Xavi: Við mætum grimmir til leiks

Miðjumaðurinn Xavi hjá Barcelona segir sína menn ætla að mæta grimma til leiks og sækja til sigurs annað kvöld þegar liðið sækir Liverpool heim í síðari leik liðanna í 16-liða úrslitum Meistaradeildarinnar. Liverpool vann frækinn 2-1 sigur í fyrri leiknum á Spáni.

Börsungar misstu toppsætið í spænsku deildinni í hendur Sevilla um helgina með því að tapa 2-1 í einvígi liðanna í toppbaráttunni. Það var skrautlegur leikur þar sem Barcelona misnotaði vítaspyrnu og þrír leikmenn fengu að sjá rauða spjaldið.

"Leikurinn á Anfield verður allt öðruvísi en leikurinn við Sevilla. Við förum þangað til að vinna og ætlum að vera mjög grimmir í sóknarleiknum. Við erum gramir eftir tapið gegn Sevilla af því við nýttum ekki færin okkar og erum nú stigi á eftir þeim í öðru sæti í stað þess að hafa náð góðu forskoti," sagði Xavi.