Sjónvarpsrás þar sem þú ert dagskrárstjóri og framleiðandi

Sjónvarpsrás sem hefur enga eiginlega dagskrárliði - Current TV - er nú að ryðja sér til rúms í Bretlandi. Sjónvarpsrásin nýtur sívaxandi vinsælda í Bandaríkjunum en Al Gore, fyrrverandi varaforseti er einn stofnenda stöðvarinnar. Í stað þess að sjónvarpa hefðbundnum framleiddum sjónvarpsþáttum og fréttum reiðir rásin sig á þátttöku áhorfenda og myndskeið sem þeir senda inn.

Ef þú ímyndar þér að þú bæðir tíu mismunandi ókunnuga einstaklinga að búa til stutt myndskeið sem ætti að lýsa óvenjulegum hliðum lífsins þar sem hvorki áhugamál þeirra né persónuleiki er sérstaklega áhugaverður og mundir svo horfa á allar myndirnar í röð án þess að hafa hugmynd um hvað kæmi næst eða hvort það mundi yfir höfuð vekja áhuga þinn þá kemstu nærri þeirri upplifun sem það er víst að horfa á Current TV.

Hvert myndskeið varir um 3-8 mínútur og efst á skjánum sést hve langt er síðan myndskeiðið fór í loftið og hversu langt er þangað til næsta verður sýnt. Handahóf ræður því svo algjörlega hvaða myndskeið birtist næst. Eins og gefur að skilja kennir ýmissa grasa á Current TV en þar getur oft að líta mjög áhugaverða þætti þar sem tekið er á alvarlegum málum með öðrum hætti en gerist og gengur.

Sem fyrr segir nýtur Current TV sívaxandi vinsælda í Bandaríkjunum en nú ná um 40 milljón heimili vestra rásinni. Nú þegar breskir sjónvarpsáhorfendur geta fylgst með rásinni má búast við því að vinsældir hennar vaxi enn. Eins geta internetnotendur um heim allan skoðað myndskeið Current TV á vefnum á slóðinni www.current.tv.