60. sigurinn hjá Phoenix

Phoenix Suns tryggði stöðu sína í öðru sæti Vesturdeildarinnar í NBA í nótt með því að leggja LA Lakers að velli 93-85. Lakers hefur verið í vandræðum undanfarna daga og er nú aðeins hársbreidd á undan grönnum sínum í Clippers og Golden State í baráttunni um sæti í úrslitakeppninni.

Steve Nash var atkvæðamestur hjá Phoenix í nótt með 26 stig og 14 stoðsendingar, en Luke Walton skoraði 19 stig hjá Lakers. Kobe Bryant hitti skelfilega úr skotum sínum og skoraði aðeins 17 stig.

Clippers vann á sama tíma auðveldan sigur á Portland 107-89 og heldur stöðu sínni í baráttunni um 8. sætið í úrslitakeppninni í Vesturdeildinni. Golden State er þar hársbreidd á eftir og stefnir í æsilega baráttu í síðustu leikjunum. Golden State lagði Sacramento 125-108 í gær.

Denver vann áttunda leikinn í röð með sigri á New Orleans Hornets 107-105, en þetta var síðasti formlegi leikur Hornets í Oklahoma City. Denver tryggði sér 6. sætið í Vesturdeildinni með sigrinum og útlit ef fyrir að liðið mæti San Antonio í fyrstu umferð úrslitakeppninnar.

San Antonio vann auðveldan sigur á Minnesota á útivelli 1110-91 og Utah lagði Dallas 104-89 á útivelli eftir að hafa tapað fimm leikjum í röð, þar sem Carlos Boozer skoraði 32 stig, hirti 15 fráköst og gaf 7 stoðsendingar hjá Utah. Dallas hvíldi nokkra af lykilmönnum sínum í leiknum og tapaði aðeins í 14. skipti í vetur.

Toronto fór langt með að tryggja sér heimavallarréttinn í fyrstu umferð úrslitakeppninnar í Austurdeildinni með góðum útisigri á Detroit í beinni á NBA TV 87-84. Washington vann loksins leik með því að leggja Atlanta 98-85, New Jersey lagði granna sína í New York 100-86 og gerði út um vonir New York um að komast í úrslitakeppnina. Milwaukee lagði Boston 104-102 og þar með er ljóst að Boston verður með lélegasta árangurinn í Austurdeildinni. Miami lagði Indiana 100-96 og Chicago burstaði Charlotte 100-81.

Hér fyrir neðan má sjá stöðuna inn í úrslitakeppni eins og dæmið lítur út í dag, en átta efstu liðin í Austur- og Vesturdeild komast í úrslitakeppnina. Hvert lið á að jafnaði um þrjá leiki eftir af deildarkeppninni.

Vesturdeildin:

1 Mavericks 65 14

2 Suns 60 19

3 Spurs 58 21

4 Utah Jazz 49 30

5 Rockets 50 29

6 Nuggets 43 36

7 L.A. Lakers 40 40

8 Golden State 39 40

----------------------------------

9 L.A. Clippers 39 40

Austurdeildin:



1 Pistons 51 28

2 Bulls     48 32

3 Raptors 46 33

4 Heat      44 36

5 Cavaliers 47 32

6 Wizards  40 39

7 NJ Nets    38 41

8 Magic       36 42

----------------------------------

9 Pacers 35 44