Meistarar Miami í vandræðum

Meistarar Miami Heat eru komnir í bullandi vandræði gegn frísku liði Chicago Bulls í úrslitakeppni NBA deildarinnar eftir að Chicago vann sannfærandi 107-89 sigur í öðrum leik liðanna í nótt. Chicago leiðir nú 2-0 í einvíginu og næstu tveir leikir fara fram í Miami.

Tölfræðin er því ekki beinlínis á bandi meistaranna, því lið sem náð hafa 2-0 forystu í sjö leikja seríu í NBA deildinni hafa í 95% tilvika náð að fara áfram. Það ætti þó að vera meisturunum nokkur huggun að þeir voru einmitt liðið sem náði að afreka að koma til baka eftir að lenda undir 2-0 og það var gegn Dallas í úrslitunum sjálfum í fyrrasumar.

Það verður þó líklega eitthvað erfiðara fyrir Miami að grafa sig upp úr þessari holu, því besti maður liðsins Dwyane Wade er þjakaður af meiðslum. Það verður engu að síður mjög áhugavert að sjá framvindu þessa einvígis, því það eru ekki nema tvö ár síðan Chicago lenti einmitt í því að ná 2-0 forystu gegn Washington í fyrstu umferð úrslitakeppninnar - en tapa svo fjórum í röð og falla úr keppni.

Sóknarleikur Chicago-liðsins var nánast óaðfinnanlegur í nótt og fremstir í flokki voru þeir Ben Gordon með 27 stig og fimm þrista og Luol Deng með 26 stig - flest þeirra í síðari hálfleik. Kirk Hinrich skoraði 14 stig og gaf 8 stoðsendingar. Chicago hitti úr 55% skota sinna í leiknum og nýtti þar að auki úr tæplega 65% þriggja stiga skota sinna (11 af 17).

Dwyane Wade var stigahæstur hjá Miami með 21 stig og 7 stoðsendingar, en hann tapaði líka 7 boltum. Shaquille O´Neal skoraði 17 stig, flest þeirra í upphafi leiks og þeir Jason Kapono, James Posey og Antoine Walker skoruðu 11 stig hver.

Þriðji leikur liðanna er í Miami á föstudagskvöldið og fjórði leikurinn á sama stað á sunnudaginn. Sá leikur verður sýndur beint á Sýn Extra um klukkan 17.