Zunepartý skemmir fyrir Xbox 360

Microsoft hefur gefið út árshlutauppgjör fyrir þriðja hluta viðskiptaársins. Afþreyingar og tækjadeild fyrirtækisins hefur ekki gengið nógu vel þrátt fyrir að búið sé að afgreiða yfir 11 miljón eintök af Xbox 360.

Hagnaður Microsoft nam 4,93 milljörðum bandaríkjadala, jafnvirði rúmlega 318 milljarða íslenskra króna. Til samanburðar nam hagnaðurinn fyrir sama tímabili í fyrra 2,98 dala, ríflega 192 milljörðum króna.

Ástæðan liggur í tekjum af sölu á Windows Vista, nýjasta stýrikerfi fyrirtækisins, og hugbúnaðarvöndlinum Office 2007, sem kom út í janúar.

Hagnaður afþreyingar og tækjadeildarinnar dróst saman um 21% og var 929 miljónir bandaríkjadalir. Deildin sem stýrir innrás Microsoft í afþreyingariðnaðinn samanstendur af The Microsoft Game Studios, Xbox 360 og Zune businesses.

Chris Liddel, yfirfjármálastjóri Microsoft, sagði AP fréttastofunni að þessi útkoma kæmi ekki á óvart. Hann bjóst við að öll markmið varðandi afþreyingar og tækjadeildina myndu nást áður en árið væri liðið. Bæði hvað varðaði Zune sem á að ná eini miljón eintaka og Xbox 360 sem á að ná 12 miljónum eintaka.

Sagt er að dýr kynningarpartý fyrir Zune hafi haft þau árhrif að aukin sala á Xbox 360 skilaði sér ekki í uppgjörinu.