Ancelotti hrósar Inzaghi

„Pippo er sannur fagmaður. Hann var hreint magnaður í kvöld," sagði Carlo Ancelotti, þjálfari AC Milan, um frammistöðu Filippo Inzaghi. AC Milan vann 3-0 sigur gegn Shaktar Donetsk á útivelli. Inzaghi kom inn sem varamaður og skoraði tvö mörk ásamt því að hann lagði hitt upp.

Inzaghi hefur þurft að verma varamannabekkinn í síðustu leikjum þar sem Alberto Gilardino hefur verið tekinn framyfir. „Þetta var mjög erfiður leikur en þetta opnaðist ekki fyrr en Inzaghi kom okkur yfir," sagði Ancelotti.

Ronaldo var í leikmannahópi AC Milan í kvöld eftir að hafa jafnað sig af meiðslum. Hann sat hinsvegar allan tímann á bekknum.

AC Milan er með níu stig í efsta sæti D-riðils. Shaktar Donetsk og Glasgow Celtic hafa sex stig hvort lið en Benfica rekur lestina með þrjú.