Ferguson: Áttum meira skilið

Sir Alex Ferguson, stjóri Manchester United, var sáttur við frammistöðu sinna manna í 0-0 jafnteflinu gegn Villareal í kvöld. Bæði lið eru komin áfram í 16-liða úrslitin eftir þessi úrslit.

Cristiano Ronaldo komst næst því að skora þegar hann átti skot í slá. Undir lok leiksins fékk Joan Capdevila, leikmaður Villareal, að líta rauða spjaldið fyrir brot á Ronaldo.

„Við áttum meira skilið. Við vorum mun betri í þessum leik en ég er sáttur. Við erum komnir áfram og það skiptir mestu máli," sagði Ferguson. „Villareal spilaði bara upp á jafntefli og þeir eru mjög ánægðir með stigið."

Ferguson var ánægður með frammistöðu dómarans, Roberto Rosetti. „Hann verndaði leikmenn og dæmdi vel," sagði Ferguson.