Mourinho: Eigum skilið það versta

Jose Mourinho, þjálfari Inter, segir að hans menn eigi ekkert betra skilið en að mæta Barcelona eða Manchester United í næstu umferð Meistaradeildarinnar.

Inter tapaði fyrir þýska liðinu Werder Bremen 2-1 í kvöld og hafnaði í öðru sæti riðils síns en gríska liðið Panathinaikos tók toppsætið. „Fyrst við enduðum með átta stig eigum við skilið að mæta mjög sterkum andstæðingi í sextán liða úrslitum," sagði Mourinho sem gat ekki leynt vonbrigðum sínum.

„Bremen sýndi mikinn styrk í kvöld og að mínu mati eru þeir með betra lið en Panathinaikos. Það lið sem hafnar í öðru sæti riðils síns og mætir Panathinaikos í næstu umferð verður það heppnasta í drættinum," sagði Mourinho en dregið verður á föstudag í næstu viku.

„Maður skapar sín eigin örlög. Eftir frammistöðuna í riðlakeppninni eigum við bara skilið að mæta Barcelona, Manchester United eða öðru liði af sama styrkleika."