Essien hélt með United árið 1999

Michael Essien mun eflaust upplifa stóran draum í kvöld þegar hann mætir Manchester United í úrslitaleik Meistaradeildarinnar með liði sínu Chelsea. Essien hoppaði hæð sína af gleði þegar uppáhaldsliðið hans United vann keppnina á dramatískan hátt árið 1999.

Essien er 25 ára gamall og fór til United á reynslu þegar hann var yngri en hann var þá harður stuðningsmaður liðsins.

"Ég hélt með United þegar ég var yngri og Roy Keane var alltaf hetjan mín. Ég þorði ekki fyrir mitt litla líf að tækla hann þegar ég fór til United til reynslu á sínum tíma. Ég horfði á leik United og Bayern í úrslitunum 1999. Það var ótrúlegur leikur," sagði Essien.