NBA í nótt: Lakers á flugi

Allt virðist ganga LA Lakers í haginn eftir að Pau Gasol gekk til liðs við félagið en félagið vann sinn þriðja útivallarsigur í röð í nótt.

Lakers vann Charlotte Bobcats, 106-97. Kobe Bryant skoraði 31 stig í leiknum og Pau Gasol 26 stig. Þeir virðast ná afar vel saman á vellinum enda sjálfsagt fáir jafn ánægðir með komu Gasol og Bryant sjálfur.

„Hin liðin þurfa nú að hafa mikið fyrir okkur eftir að Pau kom til okkar," sagði Bryant.

Lakers setti þó ekki gallalausa sýningu á svið í gær og var nærri búið að gefa alla forystuna frá sér er Charlotte skoraði þrettán stig í röð í fjórða leikhluta og minnkaði muninn í 89-86.

En þá tók Bryant til sinna mála og kláraði í raun leikinn fyrir Lakers. Þetta var líka þriðji leikurinn í röð þar sem hann skorar 30 stig eða meira.

Raymond Felton skoraði 29 stig fyrir Charlotte og gaf þar að auki átta stoðsendingar. Nazr Mohammad skoraði 22 stig og tók ellefu fráköst.

Houston vann góðan sigur á Portland, 95-83. Yao Ming skoraði 25 stig í leiknum og stýrði sínum mönnum í Houston til síns sjöunda sigurs í röð. LaMarcus Aldridge skoraði 22 stig fyrir Portland en Brandon Roy lék á nýjan leik með liðinu eftir að hafa misst af síðustu tveimur leikjum vegna dauðsfalls í fjölskyldu hans.

Cleveland vann Orlando á útivelli, 118-111. Larry Hughes minnti rækilega á sig og skoraði 40 stig og LeBron James var með 29 stig, tíu stoðsendingar og sjö fráköst.

San Antonio vann fimm stiga sigur á Toronto á útivelli, 93-88. Manu Ginobili skoraði 34 stig sem er það mesta sem hann hefur skorað í einum leik á tímabilinu. Hann tók einnig fimmtán fráköst sem er persónulegt met hjá honum.

Philadelphia vann sinn fjórða leik í röð, í þetta sinn á Dallas, 84-76. Andre Miller skoraði 21 stig fyrir Philadelphia.

Golden State vann Washington, 120-117, er Stephen Jackson skoraði 41 stig fyrir fyrrnefnda liðið - þar af sextán í fjórða leikhluta en Golden State var mest ellefu stigum undir í þriðja leikhluta. Þetta var áttundi tapleikur Washington í röð.

LA Clippers vann sjö stiga sigur á Milwaukee, 96-89.