Barcelona gisti á Hotel La Florida í nótt

Josep Guardiola, þjálfari Barcelona, tók alla 22 leikmenn sína með á hótelið fyrir leikinn á móti Lyon í kvöld og ætlar að bíða með það fram á síðustu stundu að velja 18 manna hóp.

Eiður Smári Guðjohnsen er leikfær en ekki er víst hvert hlutverk hans verður í kvöld. Barcelona nægir markalaust jafntefli eftir 1-1 jafntefli í fyrri leiknum í Frakklandi.

Guardiola fór með allt liðið á Hótel La Florida sem er fimm stjörnu hótel sem stendur á frábærum stað upp á hæð með glæsilegt útsýni yfir alla borgina. Það má sjá aðstæður leikmanna Barcelona hér.

Þrír leikmenn aðalliðs Barcelona eru meiddir og verða ekki með. Það eru Gabriel Alejandro Milito, Eric Abidal og fyrirliðinn Carles Puyol.

Leikmannahópur Barcelona lítur annars svona út: Valdés, Jorquera, Pinto, Alves, Sylvinho, Cáceres, Márquez, Piqué, Botía, Víctor Sánchez, Touré Yaya, Keita, Xavi, Sergio B., Iniesta, Eiður Smári, Hleb, Henry, Messi, Bojan, Pedro and Eto'o. Fjórir leikmenn detta síðan út áður en Guardiola tilkynnir hópinn í dag.