Zlatan: Kominn tími til að vinna Meistaradeildina

Sænski framherjinn Zlatan Ibrahimovic hjá Inter segir tíma til kominn fyrir Inter Milan að vinna sigur í Evrópukeppni eftir vonbrigði á þeim vettvangi undanfarin ár.

Inter hefur verið ósigrandi í heimalandinu undanfarin ár en sömu sögu hefur ekki verið að segja í Meistaradeildinni.

"Við erum búnir að hampa meistaratitlinum síðustu tvö eða þrjú ár og nú er kominn tími til að vinna Meistaradeildina," sagði Zlatan í samtali við Sky.

Inter mætir Manchester United í síðari leik liðanna í Meistaradeildinni í næstu viku eftir 0-0 jafntefli í Mílanó í fyrri leiknum og þar er spilað um sæti í fjórðungsúrslitum keppninnar.

"Manchester United er mjög sterkt lið en við erum líka með hörkulið. Maður verður að vinna svona leiki ef maður ætlar að verða Evrópumeistari og ég sé ekki að þetta verði vandamál ef við höldum einbeitingu. Við verðum að hafa trú á því sem við gerum og forðast mistök," sagði Svíinn.