Bebé verður í Meistaradeildarhópi United eftir allt saman

Portúgalinn Bebé verður í 25 manna Meistaradeildarhópi Manchester United en áður hafði félagið tilkynnt að hann fengi ekki að vera með á þessu tímabili ekki frekar en hinn meiddi Owen Hargreaves.

Manchester United gaf það hinsvegar út í dag að hinn tvítugi Tiago Manuel Dias Correia, eða öðru nafni Bebé, verði einn af sjö framherjum United-liðsins í komandi Meistaradeildarkeppni sem hefst í næstu viku.

Alex Ferguson keypti Bebé óvænt fyrir sjö milljónir punda frá Vitoria Guimaraes 11. ágúst síðastliðinn en leikmaðurinn á enn eftir að spila leik fyrir félagið.

Bebé spilaði hinsvegar í 0-1 tapi 21 árs landsliðs Portúgals fyrir Englandi á dögunum og verður væntanlega í aðalhlutverki á morgun þegar íslenski dómarinn Þóroddur Hjaltalín mun dæma leik Portúgals og Makedóníu í undankeppni EM hjá U21 karla.