Bayern bíður og vonast eftir góðum fréttum af Robben og Ribery

Það mun ekki koma í ljós fyrr en skömmu fyrir fyrri leik Bayern Munchen og Manchester United í kvöld í átta liða úrslitum Meistaradeildarinnar hvort tvær helstu stjörnur þýska liðsins geti tekið þátt í leiknum.

Hollendingurinn Arjen Robben og Frakkinn Franck Ribery eru báðir að glíma við meiðsli sem gæti haft af þeim þennan stærsta leik tímabilsins til þessa.

Arjen Robben tognaði á kálfavöðva í 1-2 tapi Bayern á móti Stuttgart í þýsku deildinni um helgina en Franck Ribery er að glíma við ökklameiðsli. Þá má ekki gleyma því að þriðji skapandi miðjumaðurinn, Bastian Schweinsteiger, tekur út leikbann í kvöld.

„Ég veit ekki hvort Robben eða Ribery spili í þessum leik en ef svo verður þá Þurfum við að gera ráðstafanir gegn þeim," sagði Alex Ferguson, stjóri Manchester United.