Picasso verk seldist á milljarða á uppboði

Málverk eftir meistarann Picasso seldist í gær á uppboði í London fyrir þrettán og hálfa milljón punda, eða um 2,5 milljarða íslenskra króna. Háskólinn í Sidney nýtur góðs af sölunni en verkið var gefið skólanum á síðasta ári. Sá sem gaf þessa rausnarlegu gjöf vill ekki koma fram undir nafni en söluandvirðið verður notað til þess að rannsaka offitu.

Búist hafði verið við því að verkið seldist á um 12 milljónir punda og eru forsvarsmenn háskólans í Sidney himinlifandi með árangurinn. Picasso málaði verkið árið 1935 og sýnir það ástkonu hans Marie-Therese Walter, sem þá var aðeins sautján ára gömul. Áður en það var sýnt á uppboðinu hafði það aðeins einu sinni áður komið fyrir sjónir almennings. Nafn hins nýja eiganda hefur ekki verið gert opinbert en hann er þriðji eigandi verksins.

Fyrsti eigandinn var stofnandi Chrysler bílaverksmiðjanna, Walter Chrysler. Hann seldi það til mannsins sem ánafnaði því síðan til skólans en verkið var hluti af enn stærri gjöf, því hann gaf skólanum einnig um tíu önnur málverk, peninga, hlutabréf og skartgripi.