Samkvæmt rannsókn sem fjárfestavefurinn Nordnet hefur gert á hlutabréfaviðskiptum í norrænum kauphöllum kemur í ljós að hlutabréfavísitölur hækka að jafnaði mun meira á þessum degi en öllum öðrum dögum ársins. Greint er frá þessu í Berlingske Tidende.
Rannsókn Nordnet nær frá árinu 1989 og fram til dagsins í dag. Hvað kauphöllina í Kaupmannahöfn varðar hefur OMXC20 vísitalan þar hækkað að jafnaði um 0,03% á dag á þessu tímabili. Þann 14. febrúar ár hvert hefur vísitalan hinsvegar hækkað að jafnaði um 0,45% eða margfalt á við meðaltalið.
Besti Valintínusardagurinn í kauphöllinni í Kaupmannahöfn varð árið 2003 þegar vísitalan hækkað um 2%. Sá versti var árið 1991 þegar vísitalan féll um 0,6%.
Samskonar þróun hefur verið í kauphöllinni í Osló þar sem hlutabréfavísitalan hefur hækkað um 0,26% að jafnaði á Valintínusardag miðað við 0,05% hækkun á öllum öðrum dögum ársins.
Max Gandrup forstjóri Nordnet segir í samtali við Berlingske Tidende að Valintínusardagurinn sé á margan hátt orðinn árangursríkur viðskiptadagur. Krónumerki komi í augun á blómasölum og sælgætisbúðareigendum þennan dag.
"Að viðskiptin gangi alla jafna betur í kauphöllinni þennan dag en aðra verðum við hinsvegar að álíta að sé skemmtileg tilviljun," segir Gandrup.
