Nubo leitar hófanna um byggingu skemmtigarðs í Óðinsvéum

Borgaryfirvöld í Óðinsvéum í Danmörku eru bjartsýn á að kínverski fjárfestirinn Huang Nubo muni byggja H.C. Andersen skemmtigarð í borginni en viðræður um slíkt hafa farið fram milli borgarstjórans Anker Boye og Nubo.

Fjallað er um málið á vefsíðu börsen. Þar segir að Nubo ætli sér að byggja þennan þemagarð í samstarfi við kínverska þróunarbankann. Áður hafa ýmis áform um slíkan garð byggðan á sögum H.C. Andersen, þekktasta borgarbúa Óðinsvéa, farið út um þúfur.

Boye segist hinsvegar bjartsýnn á að garðurinn verði loksins að veruleika og að Nubo hafi mikinn áhuga á að byggja hann.

Fram kemur í börsen að kínversk sendinefnd með Nubo í broddi fylkingar hafi einnig heimsótt Láland og Kaupmannahöfn í þessari ferð sinni þar sem kannaðir voru möguleikar á fjárfestingum.

Þá vitnar börsen í Ole Sohn efnahagmálaráðherra Dana sem hvatti nýlega til þess að fjárfestar kæmu að byggingu risavaxins milljarða danskra króna skemmtigarðs sem yrði á alþjóðlega vísu.