Bretar versla mest á netinu af stórþjóðum

Netverslun er vinsælli hjá Bretum en nokkuri annarri stórþjóð í heiminum

Þetta eru niðurstöður árlegrar könnunnar Ofcom eða hinnar opinberu fjarskiptastofnunnar Bretlands. Samkvæmt þessari könnun, sem náði til 17 þjóða, eyðir hver Breti að meðaltali tæplega 1.100 pundum, eða 220.000 krónum í kaup á vörum á netinu á hverju ári.

Sú stórþjóð sem kemst næst Bretum hvað netviðskipti varðar er Ástralía en hver Ástrali eyðir að meðaltali rúmlega 840 pundum á ári.

Í frétt um málið á vefsíðu BBC segir að Bretar noti einkum farsíma sína til þess að versla á netinu. Sem dæmi er nefnt að í desember í fyrra notaði hver Breti að meðaltali 424 megabæt til gagnaflutninga í gegnum farsímann. Til samanburðar var meðalnotkunin í Japan hvað þetta varðar 392 megabæt á sama tímabili.

Fram kemur að netteningar í Bretlandi séu enn þær ódýrustu meðal stórþjóða og raunar helmingi ódýrari en í Bandaríkjunum.