Ekki víst að um mistök hafi verið að ræða

Lögregluyfirvöld í Pretoria í Suður-Afríku segja að ekki sé víst að Oscar Pistorius hafi skotið kærustu sína fyrir mistök, eins og haldið hefur verið fram í fjölmiðlum í morgun.

Talsmaður lögreglunnar sagðist í samtali við breska ríkisútvarpið vera hissa á þeim fréttum – það hafi ekki komið frá lögreglunni.

Þá kom einnig fram í máli talsmannsins að lögreglan hafi sinnt nokkrum útköllum að undanförnu þar sem til deilna hefur komið á milli Pistorius og kærustunnar, Reevu Steenkamp. Þau höfðu verið kærustupar í tvo mánuði.

Spretthlauparinn mun mæta fyrir dómstóla í dag þar sem hann verður ákærður fyrir morð.