Hávaðarifrildi og öskur heyrðust frá íbúðinni

Mál suður-afríska spretthlauparans Oscar Pistorius heldur áfram, en í dag halda réttarhöldin um hvort sleppa eigi honum lausum gegn tryggingagjaldi áfram. Hann er grunaður um að hafa myrt kærustu sína, Reevu Steenkamp, með því að skjóta hana í gegn um baðherbergishurð.

Vitni segja hávaðarifrildi hafa heyrst frá íbúðinni áður en byssuskot heyrðust. Eftir fyrsta byssuskotið hafi kvenrödd öskrað og síðan hafi fleiri skotum verið hleypt af. Eitt skothylki fannst á ganginum, en þrjú inni á baðherberginu sjálfu.

Lögreglumaðurinn Hilton Botha, sem var fyrstur á staðinn og fer fyrir rannsókn málsins, sagði í dómssal að svo virðist sem skotið hafi verið úr byssu spretthlauparans niður á við, og leiðir þannig að því líkur að Pistorius hafi staðið á gervifótum sínum þegar hann skaut Reevu. Sjálfur sagði Pistorius að hann hafi ekki fest á sig fæturna, og staðið á stubbunum þegar hann skaut.

Rifrildi og hótanir

Þá hefur lögreglan undir höndum vitnisburð knattspyrnumanns sem segir Pistorius hafa hótað að brjóta á honum fæturna. Einnig er minnst á atvik á Kyalami-kappakstursvellinum, þar sem Pistorius er sagður hafa lent í rifrildi við mann, og hótað honum ofbeldi í kjölfarið.

Botha talar einnig um atvik í janúar, þar sem Pistorius var sagður hafa hleypt af byssu inni á veitingastað. Í kjölfarið hafi hann beðið vin sinn að taka á sig sökina vegna þess að atvikið gæti annars valdið fjölmiðlafári, sem vinurinn gerði.

Yfirheyrslur halda áfram í dag og sagt verður nánar frá þeim síðar í dag.