Jon Jones - Besti bardagamaður heims

Jon Jones er ríkjandi meistarinn í léttþungavigt UFC í dag. Þessi 26 ára bardagamaður er einfaldlega besti MMA bardagamaður heims um þessar mundir.

Jon Jones er enginn venjulegur bardagamaður. Eftir að hafa orðið yngsti meistarinn í sögu UFC aðeins 23 ára aldri hefur hann varið titil sinn sex sinnum. Hann er sennilega hæfileikaríkasti bardagamaður sem sést hefur í MMA.

Jon Jones kom inn í UFC sem góður glímumaður en glímdi þó aldrei í bandarísku háskólaglímunni. Hann hafði vissulega getuna til að fara þá leið en varð faðir ungur að aldri og hætti því í skóla.

21 árs gamall setti Jones stefnuna á að gerast atvinnumaður í MMA. Á þremur mánuðum tók hann 6 bardaga og sigraði þá alla afar sannfærandi. Hann fékk því samning við UFC eftir að hafa verið atvinnumaður í íþróttinni í aðeins hálft ár. Það er nokkuð sem fáir geta leikið eftir.

Bardagaáhugamenn tóku fyrst eftir honum þegar hann sigraði reynsluboltann Stephan Bonnar sannfærandi. Hann kastaði Bonnar til og frá og beitti snúnings olnbogaskotum glæsilega sem bardagaáhugamenn slefuðu yfir.

Eina tapið hans kom gegn Matt Hamill þar sem hann var dæmdur úr leik fyrir að beita ólöglegum olnbogaskotum. Hann var þó að gjörsigra Hamill allan tíman og ekki margir sem telja þetta sem tap heldur frekar dómaramistök.

Eftir að hafa labbað í gegnum Brandon Vera, Vladimir Matyushenko og Ryan Bader fékk hann óvænt titilbardaga gegn Shogun Rua vegna meiðsla upprunalega andstæðings Rua. Shogun Rua er ein mesta goðsögn í sögu MMA en Jones lét það ekki hafa nein áhrif á sig og gjörsigraði meistarann. Bardaginn flokkast sem einn ójafnasti titilbardagi í sögu UFC.

Sama dag og Jones átti að berjast um titilinn varð hann vitni að ráni á götum úti. Þrátt fyrir að eiga sinn mikilvægasta bardaga ferilsins sama kvöld hljóp hann á eftir ræningjanum og sparkaði hann niður. Jones hélt ræningjanum niðri þangað til lögreglan handtók manninn.

Eftir sigurinn á Shogun Rua sigraði hann hverja goðsögnina á eftir annarri. Hann sigraði fimm fyrrum UFC meistara í röð og lét það líta auðveldlega út. Hann hefur litið út fyrir að vera nánast ómannlegur í þessum bardögum fyrir utan sinn síðasta bardaga.

Í september í fyrra mætti Jones Svíanum Alexander Gustafsson. Eins og fyrir flesta bardaga Jones var búist við að meistarinn myndi labba auðveldlega í gegnum Gustafsson. Þvert á móti var þetta hans lang erfiðasti bardagi til þessa en Jones sigraði eftir dómaraúrskurð. Búist er við að þeir mætist aftur síðar á árinu.

Þrátt fyrir að vera að upplagi glímumaður hefur hann á ótrúlega skömmum tíma orðið af frábærum sparkboxara. Jones er með gríðarlega langa útlimi (lengstu faðmlengd í UFC) sem hann notar til að halda andstæðingum sínum frá sér með spörkum. Hann er auk þess með gríðarlega vel tímasett olnbogaskot og hafa margir orðið fyrir barðinu á þeim.

Hann er í raun með einstakan stíl. Hann heldur andstæðingum sínum vel frá sér með frábæru sparkboxi sínu en ef þeir komast nálægt honum beitir hann grísk-rómversku glímuhæfileikum sínum til að kasta þeim.

Margir halda því fram að Jones sé Muhammad Ali MMA heimsins og hans verði minnst sem besta bardagamanns í sögu MMA. Það er of snemmt að segja til um það að svo stöddu en það er ljóst að þessi 26 ára bardagamaður á nóg eftir. Hann ver titil sinn í 7. sinn í kvöld þegar hann mætir Glover Teixeira. Bardaginn er í beinni útsendingu á Stöð 2 Sport og hefst útsendingin kl 2.

Vísir og MMA fréttir hafa tekið höndum saman í umfjöllun um MMA. Pétur Marinó er ritstjóri MMA frétta og birtir fréttir úr MMA heiminum á Vísi. Ekki gleyma að setja "like" við Facebook síðu þeirra hér.