Jón Arnór fer á fyrstu æfinguna strax eftir læknisskoðun

Íslenski landsliðsmaðurinn Jón Arnór Stefánsson fyllir skarð Zoran Dragic hjá spænska stórliðinu Unicaja Malaga samkvæmt frétt á heimasíðu liðsins en Jón Arnór samdi við Unicaja um helgina.

Slóveninn Zoran Dragic fékk sig lausan frá Unicaja-liðinu og ætlar þess í stað að reyna fyrir sér í NBA-deildinni með bróður sínum Goran Dragic hjá Phoenix Suns.

Jón Arnór er búinn að vera í Bandaríkjunum við æfingar en hann kom til Malaga í gær og gekkst undir læknisskoðun í morgun.

Á heimasíðu Unicaja segir ennfremur frá því að Jón Arnór fari á sína fyrstu æfingu strax eftir þessa læknisskoðun og að forráðamenn félagsins bindi vonir við það að Jón geti spilað fyrsta leik tímabilsins um næstu helgi.