Gunnar á leið í sneiðmyndatöku

Haraldur Nelson faðir Gunnars Nelson var í viðtali á Bylgjunni strax eftir tap Gunnars gegn Rick Story í UFC í Stokkhólmi í kvöld. Þar sagði Haraldur meðal annars að Gunnar væri á lið í sneiðmyndatöku í samtali við Valtý Björn Valtýsson og Brynjar Hafsteinsson frá MMA Fréttum.

 

Gunnar var sleginn niður í fjórðu lotu og þegar menn eru slegnir niður í UFC eru þeir alltaf sendir í heilaskann.

„Það er verið að skoða hann en hann er allt í lagi þannig. Hann var sleginn niður og UFC eru með mikið læknateymi sem skoða menn nákvæmlega. Þeir setja menn í heilaskann eftir að vera slegnir niður. Ég er búinn að tala við hann og hann er í fínum gír,“ sagði Haraldur á Bylgjunni.

„Gunni mun læra mikið af þessum bardaga. Nú tekur við það sem hann ætlaði að gera, það er að fara í pásu fram yfir áramót. Svo sjáum við til.

„Hann hefði þurft að vinna þennan bardaga til að færa sig ofar en nú er það aðeins lengra tilhlaup og svo fer hann upp á við,“ sagði Haraldur meðal annars á Bylgjunni.