Margrét Rósa með 67 prósent þriggja stiga skotnýtingu

Margrét Rósa Hálfdanardóttir gat ekki hjálpað íslenska kvennalandsliðinu í körfubolta í leikjunum á móti Ungverjum og Slóvakíu í undankeppni EM en hún er í stóru hlutverki hjá körfuboltaliði Canisius-háskólans.

Margrét Rósa átti enn á ný góðan leik í nótt þegar Canisius vann 80-50 heimasigur á Binghamton-skólanum. Margrét Rósa skoraði 14 stig á 23 mínútum og var stigahæst í liðinu. Næststigahæsti leikmaðurinn var síðan landa hennar Sara Rún Hinriksdóttir með 12 stig.

Sara Rún Hinriksdóttir er nýliði hjá Canisius-liðinu og þetta var hennar besti leikur til þessa en Sara skoraði 12 stig á 15 mínútum. Sara Rún hitti meðal annars úr báðum þriggja stiga skotum sínum í leiknum og Margrét Rósa setti niður 3 af 4 þriggja stiga skotum sínum. Saman hittu íslensku stelpurnar því úr 5 af 6 þriggja stiga skotum sínum.

Íslenska kvennalandsliðið saknaði líka Söru í leikjunum en báðar voru þær tvær af þremur stigahæstu leikmönnum landsliðsins í fyrstu sex landsleikjum ársins.

Þetta var þriðji leikurinn í röð þar sem Margrét Rósa er stighæst hjá Canisius-háskólaliðinu en hún skoraði 19 stig í sigri á Saint Francis og 12 stig í tapi á móti Buffalo-skólanum.

Margrét Rósa hefur skorað 12,5 stig að meðaltali í leik í fyrstu fjórum leikjum tímabilsins en Sara Rún er með 5,8 stig að meðaltali á 12,3 mínútum í leik.

Margrét Rósa hefur nýtt skotin sín frábærlega í þessum fyrstu fjórum leikjum vetrarins en hún er meðal annars með 67 prósent þriggja stiga nýtingu, hefur nýtt 10 af 15 skotum sínum fyrir utan þriggja stiga línuna.