Stærsta þota Bombardier mátar Reykjavíkurflugvöll

Stærsta farþegaþota Bombardier og nýjasta stolt kanadískrar flugvélaframleiðslu millilenti í Reykjavík eftir flugprófanir í Evrópu. Í fréttum Stöðvar 2 í kvöld verða sýndar myndir af flugvélinni og rætt við flugstjórann. 

Flugfélag Íslands er þegar komið með fimm Bombardier-skrúfuþotur sem taka allt að 76 farþega. Nýjasta tegundin frá verksmiðjunum í Montreal í Kanada er hins vegar tvöfalt stærri, heitir Bombardier CS 300 og tekur allt að 160 farþega. Flugprófanir hafa staðið yfir í eitt og hálft ár en Air Baltic verður fyrsta flugfélagið sem tekur hana í notkun í næsta mánuði.

Kanadamenn lögðu henni beint fyrir utan höfuðstöðvar Icelandair á Reykjavíkurflugvelli og buðu fulltrúum íslenskra flugrekenda að skoða gripinn enda vonast þeir til að geta selt Íslendingum fleiri Bombardier-vélar.

Þotan er sögð sparneytin og afar hljóðlát, hljóðspor hennar er sagt fjórfalt minna en hjá eldri vélum. Hún þarf einnig stuttar flugbrautir og flugstjórinn, Mark Elliot, segir brautirnar í Reykjavík nægilegar langar til að hún geti flogið þaðan fullhlaðin farþegum, bæði til Evrópu og Bandaríkjanna.