Stöð 2 heimsækir Repúblikana: „Bandaríkin verða stórkostleg aftur“

Í kosningamiðstöð Repúblikanaflokksins í Fairfax í Virginíu hafa hundruð sjálfboðaliða tekið þátt í því að fá fólk til að mæta á kjörstað.

Stöð2 fór í heimsókn á sunnudag, þegar kosningabaráttan var á lokametrunum, og fékk að fara ofan í kjallara kosningamiðstöðvarinnar, þar sem sjálfboðaliðar sitja við símann og hvetja kjósendur til að veita Trump atkvæði sitt. 

Öðru vísi að taka þátt í þessari kosningabaráttu

Formaðurinn, Matt Ames, hefur unnið með Repúblikanaflokknum í 10 ár en segir kosningabaráttuna nú skera sig úr.

„Ég myndi segja að áhuginn sé svipaður, en frambjóðendurnir í ár höfða til mjög ólíkra hópa í samfélaginu. Það er eitt sem ég hef tekið eftir, þegar þú heyrir að Donald Trump höfði til annars konar hópa lýðfræðilega. Ég held að það sé satt og við sjáum það hér, hvað varðar það fólk sem kemur að leggja okkur lið," sagði Matt í samtali við Stöð2.

Hvaða hópar eru það þá sérstaklega sem Trump nær til?

„Það er svolítið erfitt að lýsa því í samhengi við Fairfax sýslu...en ætli ég myndi ekki segja að hann höfði meira til millistéttarfólks," segir Matt.

Treystir á viðskiptavit moldríka milljarðamæringinn

Ein af þeim er Theresa Antonio. Fjölskylda hennar flutti frá Filippseyjum til Bandaríkjanna vegna þess að þau trúa á takmarkað ríkisvald, líkt og Republikanar boða.

„Donald Trump skapar störf. Hann er moldríkur milljarðamæringur, hann á Trump turnana og hefur skapað milljónir af störfum og ég trúi því að þökk sé þessum bakgrunni þá muni hann gera Bandaríkin stórkostleg aftur," sagði Theresa þegar fréttamaður Stöðvar 2 spurði hvers vegna hún gerðist sjálfboðaliði fyrir Repúblikana.

En hvað þýðir þetta slagorð, að gera Bandaríkin stórkostleg aftur? 

„Það er ekki mikið framboð af góðum atvinnutækifærum í Bandaríkjunum. Fullu starfi fyrir fólk eins og mig. En ég tel að Donald Trump muni nýta viðskitavit sitt til þess að gera Bandaríkin stórkostleg aftur, því hann kann að útvega fólki vinnu."

Verðum örugg aftur þökk sé Donald Trump

Í kosningamiðstöðina var líka mætt Margrit McOlof, sem hefur fylgt Repúblikanaflokknum að máli alla sína ævi og segir Donald Trump einstakan mann sem verði frábær forseti.

„Mér finnst hann hafa frábæra áætlun sem muni gera landi okkar sterkara og betra. Hann er með margar tillögur að því hvernig hægt er að bæta efnahaginn," nefndi Margit sem dæmi í samtali við Stöð2.

„Donald Trump hefur sterka skoðun á því að það eigi að efla herinn, og um það að útrýma Isis. Hann ætlar að taka á hörku af Isis. Hann ætlar að taka stjórnina aftur yfir landamærum okkar, þannig að okkur finnist við aftur örugg. Svo er önnur ástæða fyrir þvi að ég held upp hann og hún er sú að hann er á móti fóstureyðingum. Af öllum þessum ástæðum styð ég Donald Trump og þess vegna er ég komin í dag til að bjóða fram hjálp mína."

Telur Trump hafa vindinn í bakið

Mjótt er á munum milli Donalds Trump og Hillary Clinton á lokametrunum. Í síðustu forsetakosningum vann Barack Obama Virginíuríki naumlega, með 51%. En Margit er bjartsýn á að úrslitin falli repúblikönum í vil.

„Ég er mjög bjartsýn. Ég held að hann hafi mikinn meðvind núna, augnablikið er hans. Það hefur verið mikill áhugi í allri kosningabaráttunni en ég held hann sé að vaxa meira og meira nuna og ég er mjög bjartsýn fyrir þriðjudaginn."