Icelandair flýgur til Belfast

Icelandair tilkynnti í dag Belfast sem nýjan áfangastað í leiðakerfi félagsins. Flugfélag Íslands mun annast flugið á Bombardier Q400 flugvél félagsins sem tekur 72 farþega í sæti í samstarfi við Icelandair.

Flogið verður til og frá Keflavíkurflugvelli Flogið verður til George Best City Airport en flugið tekur um þrjá tíma.

Belfast er höfuðborg Norður-Írlands og segir Simon Hamilton, efnahagsmálaráðherra Norður-Írlands, að flugið muni opna á samgönguleiðir til og frá landinu.

„Þessi nýja flugleið til Íslands mun sannarlega opna fyrir samgöngur okkar við Norður-Ameríku og er mikilvægur áfangi í þvi að auðvelda fólki um allan heim að komast til Norður-Írlands hvort sem það er í viðskiptaerindum eða til skemmtunar,“ er haft eftir Hamilton í tilkynningu frá Icelandair.

Belfast verður 44. áfangastaðurinn í leiðarkerfi Icelandair og hefst flugið þann 1. júní næstkomandi. Flogið verður allt árið, þrisvar sinnum í viku, á þriðjudögum, fimmtudögum og sunnudögum.