Noel snýr aftur til Ís­lands í sumar: „Ég er ekki hræddur við að villast“

Bandaríski ferðalangurinn Noel Santillan, sem vakti mikla athygli vegna GPS-vandræða og annarra ævintýra sinna hér á landi á síðasta ári, hyggst snúa aftur til Íslands næsta sumar. Noel greindi frá þessu á Facebook-síðu sinni fyrr í dag.

Íslandsvinurinn Noel varð stjarna á einni nóttu þegar hann ók frá Keflavík og fór að fyrirmælum GPS-tækisins og hafnaði á Siglufirði í stað miðborgar Reykjavíkur þar sem hann átti bókað hótelherbergi á Hótel Frón við Laugaveg. Hann stimplaði inn á GPS-tæki bílsins þær upplýsingar sem fyrir lágu, Hótel Frón við LaugaRveg, hlýddi tækinu, og var kominn til Siglufjarðar nokkrum tímum síðar.

En af hverju vilt þú koma aftur til Íslands?

„Ég varð einfaldlega ástfanginn af landinu. Mér fannst maturinn frábær og ég hef hvergi drukkið betra vatn. Svo eignaðist ég marga vini þarna. Ég vil kynnast landinu og íslenskri menningu betur,“ segir Noel.

Noel kemur frá New Jersey og á bókað flug frá New York að kvöldi 21. júní og kemur til landsins að morgni 22. júní. Hann býst við að vera á landinu í eina viku og segist hlakka mikið til. „Eina vandamálið er að ég neyðist eitthvað til að sofa. Það er svo mikil tímasóun. Ég væri til í að vaka allan tímann.“

Þú komst síðast í febrúar og þá var dimmt. Nú kemurðu hins vegar að sumri, þannig að þú mátt búast við mikilli birtu, líka á nóttunni, sem mun kannski eitthvað trufla svefninn.

„Já, ég veit. Það er líka ein af ástæðum þess að ég ákvað að koma að sumri í þetta skiptið. Ég vil fá að upplifa miðnætursólina.“

En ertu eitthvað byrjaður að plana ferðina?

„Nei, ég er ekki byrjaður að því. Ég er ekki mikill planari. Þetta verður bara að ráðast einhvern veginn. Mér finnst það líka besta leiðin til að ferðast. Ég er ekki hræddur við að villast. Ég elska að villast. Þá hittir maður líka nýtt fólk og það er besta leiðin til að skemmta sér.“

Þú ert sem sagt vanur því að villast?

„Já, ég er það. Reyndar ekki svona svakalega eins og á Íslandi í fyrra, en jú, það kemur oft fyrir. Mér finnst það frábært.“

Noel segist búast við að leigja bíl líkt og síðast og kveðst ætla að koma með GPS-tækið sem hann fékk að gjöf á Íslandi í fyrra.

„Ég vil fara aftur til Siglufjarðar og hitta Sirrý og hina vini mína sem ég kynntist þar. Ég vil snúa aftur á staðinn þar sem þetta byrjaði allt saman. Ég heyrði að það væri líka hægt að fljúga norður í land og aka stutta leið til Siglufjarðar.“

Já, til Akureyrar.

„Einmitt. Akureyrar. Kannski að ég geri það í staðinn. Það er svolítið langt að keyra alla þessa leið frá Keflavík til Siglufjarðar. En við sjáum til hvernig þetta fer allt saman. Ég hlakka alla vega mikið til.“

Að neðan má hlusta á útvarpsviðtal sem tekið var við Noel í Brennslunni í síðustu heimsókn hans til landsins.