„Vonuðumst alltaf eftir því að niðurstaða endurupptökunefndar yrði endirinn á verkinu“

„Við erum alveg á lokametrunum núna og vorum auðvitað að vonast til þess að niðurstaða endurupptökunefndar lægi fyrir áður en við þyrftum að ljúka myndinni,“ segir Margrét Jónasdóttir, framleiðandi hjá Saga Film.

Myndin sem um ræðir ber nafnið Out of Thin Air og er heimildarmynd um Guðmundar- og Geirfinnsmálið. Hún er samstarfsverkefni Saga Films og breska kvikmyndaframleiðandans Mosaic Films en leikstjóri myndarinnar er Bretinn Dylan Howitt.

Efnisveitan Netflix er stærsti einstaki fjármögnunaraðili myndarinnar en veitan hefur aldrei áður fjárfest í efni sem framleitt er hér á landi.

Eins og kunnugt er hefur endurupptökunefnd kynnt ákvörðun sína um að taka upp mál fimm sakborninga af sex í Guðmundar- og Geirfinnsmálinu aftur til meðferðar hjá dómstólum. Mál Erlu Bolladóttur verður ekki tekið upp en hún sat í þrjú ár í fangelsi vegna málsins. 

Sjá einnig: Guðmundar- og Geirfinnsmálin: Fimm mál tekin upp að nýju

 

Ráðgert var að smiðshöggið yrði rekið á myndina í apríl og því hefðu tíðindin um endurupptöku máls fimmmenninganna ekki mátt vera mikið seinni á ferðinni.

„Í raun og veru höfum við verið að vinna markvisst að því að þessar niðurstöður kæmu svona á elleftu stundu og jafnvel að við yrðum að skila af okkur áður.“ segir Margrét.

Myndin er heimildarmynd í fullri lengd og segir Margrét að nú þurfi líklegst að skera út efni til þess að hægt sé að skeyta við hana nýjum endalokum sem er að sjálfsögðu niðurstöður endurupptökunefndarinnar. Meðal annars er um að ræða myndefni sem sýnir viðbrögð aðstandenda fimmmenninganna við niðurstöðunni. 

Hins vegar segir Margrét að ef draga fer til enn frekari stórtíðinda í málinu verði skoðað hvort möguleiki sé á að draga örlítið útgáfu myndarinnar.  

Aðspurð að því hvort til greina komi að gera framhaldsmynd ef málið tæki nýja stefnu segir Margrét að allt slíkt sé í skoðun en samningurinn, sem er á milli framleiðenda myndarinnar og BBC, Rúv og Netflix, miði aðeins við eina mynd í fullri lengd. „Maður veit auðvitað ekki hvað gerist,“ segir Margrét.

Margrét gleðst yfir fregnum gærdagsins en harmar það að mál Erlu Bolladóttur verði ekki tekið upp að nýju.

„Auðvitað eru þetta gleðifréttir fyrir þau fimm en okkur finnst óskaplega sárt að mál Erlu Bolladóttur skuli ekki vera tekið upp. Það er leiðinlegt að sjá að málið skyldi ekki hafa verið tekið upp í heild sinni fyrir þau öll sex.“