Yfir hundrað heimilisofbeldismál á borð lögreglu frá áramótum

112 heimilisofbeldismál eru komin á borð lögreglu frá áramótum. Lögreglustjóri segir allt kapp lagt á málaflokkinn og að lögregla geri allt sem í hennar valdi standi til að sporna gegn heimilisofbeldi.

Íslenskur karlmaður var handtekinn í Texas á fimmtudag í síðustu viku grunaður um að beita kærustu sína ofbeldi. Hann var látinn laus úr fangelsi degi síðar eftir að hafa reitt fram sex þúsund dala tryggingafé, um 674 þúsund krónur.

Í Fréttablaðinu í dag er rætt við sambýliskonu mannsins sem segir að hann hafi einnig beitt sig ofbeldi. Sú var í sambandi með honum í 17 ár og segir hann margoft hafa gengið í skrokk á henni, yfirleitt fyrir framan börnin þeirra.

Heimilisofbeldi eru algeng brot hér á landi og eru 112 mál komin á borð lögreglu það sem af er ári.

Heimilisofbeldismál hjá Lögreglunni á höfuðborgarsvæðinu voru 232 árið 2012, 258 árið 2013 og 294 árið 2014. Árið 2015 voru málin hins vegar orðin 642 og árið 2016 voru þau 647.

Sigríður Björk Guðjónsdóttir, lögreglustjóri, segir að ofbeldi sem slíkt hafi í raun ekki aukist.

„Við teljum að skýringin sé tvíþætt, annars vegar breytt skráning hjá okkur og hins vegar fleiri mál sem eru tilkynnt til okkar

Í 74 % heimilisofbeldismála hjá Lögreglunni á höfuðborgarsvæðinu eru skráðar líkamsárásir,  í 5 % málanna hefur kyrkingartaki verið beitt og  í 10 % mála eru skráð einhverskonar vopn svo sem hnífar, kústsköft, kertastjakar og skæri. Þá eru karlar gerendur í 82 % tilfellanna og í 57% þeirra eru börn skráð á heimili.

Sigríður segir að áður hafi verið algengara að málin væru felld niður.

„Bæði út af sönnunarstöðu og líka út af tímapunktinum, hvenær lögreglan var að vinna þessi mál því núna förum við inn strax og útkallið kemur og reynum að rannsaka eins mikið og hægt er strax á staðnum. Passa að þolandi leiti læknis, að hann fái stuðning og síðan eru teknar ákvarðanir, jafnvel um nálgunarbann eða brottvísun af heimili í alvarlegustu málunum. Þessi tegund ofbeldis er mjög skaðleg, eins og raunar allt ofbeldi, og við höfum gefið þau skýru skilaboð að við ætlum að gera allt sem í okkar valdi stendur til að sporna gegn þessu.“