Farþegum Icelandair fjölgaði lítillega

Farþegar Icelandair í síðasta mánuði voru tæplega 332 þúsund og er það aukning um fjögur prósent samanborið við sama mánuð í fyrra.

Tölur um fjölgun ferðamanna milli ára í maímánuði liggja ekki fyrir en sé litið til aprílmánaðar má sjá að farþegum um Keflavíkurflugvöll fjölgaði um 62 prósent á milli mánaða.

Í tilkynningu frá Icelandair til Kauphallarinnar segir að sætanýting í nýliðnum mánuði hafi verið rúmlega 81 prósent. Þá hafi farþegar Air Iceland Connect verið 29 þúsund í síðasta mánuði sem er tólf prósenta aukning á milli ára.