Drap eiginkonuna því hún hló að honum

Karlmaður er grunaður um að hafa ráðið eiginkonu sinni bana um borð í skemmtiferðaskipi við Alaska. Vitni segir að maðurinn hafi drepið konuna vegna þess að hún hætti ekki að hlæja að honum.

Lík konunnar fannst í káetu þeirra hjóna. Miklir höfuðáverkar voru á því. Maðurinn hefur verið ákærður fyrir morðið, að sögn breska ríkisútvarpsins BBC.

Vitni sem kom inn í káetuna á undan öryggisvörðum segist hafa séð manninn draga lík konunnar í átt að svölum káetunnar. Vitnið greip hins vegar í ökkla konunnar og togaði hana aftur inn.

Þegar vitnið spurði manninn hvað hefði gerst á hann að hafa sagt: „Hún vildi ekki hætta að hlæja að mér“.

Atburðurinn átti sér stað um borð í skemmtiferðaskipinu Emerald Princess á þriðjudagskvöld. Maðurinn, sem er 39 ára gamall eins og eiginkonan var, er sagður hafa sagt alríkislögreglumönnum að lífi hans væri lokið. Hann var handtekinn þegar öryggisverðirnir sáu blóð á höndum hans og fötum.