Hefur hafið tilraunir með kakóframleiðslu

Garðyrkjuskólinn á Reykjum í Ölfusi hefur hafið tilraunir með kakóframleiðslu á Íslandi en von er á fyrstu uppskeru mjög fljótlega.

Í Garðyrkjuskólanum, sem er hluti af Landbúnaðarháskóla Íslands er svokallað bananagróðurhús með hitabeltisplöntum. Þar er til dæmis að finna fimm ára gamla kakóplöntu. Guðríður Helgadóttir, staðarhaldari á Reykjum í Ölfusi sýndi í kvöldfréttum Stöðvar 2 í gær hvernig ræktun á kakóbaunum gengur fyrir sig.  

Fræbelgur kakóplöntunnar er stór og hvítur að innan með tveggja til þriggja sentímetra þykku aldini sem umlykur fræin. Í honum myndast allt að sextíu fræ sem eru hinar eiginlegu kakóbaunir sem eru þurrkaðar og muldar í duft sem er þá kakóið sjálft.

Guðríður segir mjög gaman fyrir skólann og ekki síst nemendur hans að gera tilraunir með kakóplönturnar. „Auðvitað verður þetta ekki stóriðnaður á Íslandi í sumar en hugsanlega er þetta tækifæri fyrir einhvern til að fara af stað og rækta kakó og framleiða eitthvað eðal íslenskt gúmmelaði kakó eða súkkulaði,“ segir hún.