Till flúði til Brasilíu eftir að hafa verið stunginn í bakið

Bardagakappinn sem Gunnar Nelson mætir vonandi í London í mars, Englendingurinn Darren Till, á sér ansi merkilega sögu.

Þetta er 25 ára gamalt jólabarn sem á afmæli á aðfangadag. Hann kemur frá Liverpool og byrjaði að æfa muay thai er hann var 12 ára gamall. Þá strax var ljóst hvert leið hans myndi liggja í lífinu.

Hann var í raun óþekktur bardagamaður þar til í október á síðasta ári er hann pakkaði Donald „Cowboy“ Cerrone saman í fyrstu lotu í bardaga í Póllandi. Þá komst hann á kortið með stæl og var valinn „breakthrough“ bardagamaður ársins hjá UFC.

Afdrifaríkt partí

Leiðin í sviðsljósið og inn á styrkleikalista UFC hefur þó ekki verið auðveld fyrir Till. Er hann var 19 ára gamall þá breyttist líf hans til frambúðar er hann var stunginn tvisvar í bakið og mátti þakka fyrir að lifa af.

„Ég var staddur í partí og það brutust út slagsmál. Ég stökk til að hjálpa vini mínum þegar ég er stunginn tvisvar í bakið,“ segir Till sem þá var í ekkert allt of góðum félagsskap.

Þjálfarinn hans, Colin Heron, stakk þá upp á því að hann færi til Brasilíu þar sem hann æfði undir handleiðslu Marcelo Brigadeiro hjá Astra Fight Team. Þangað fór hann með takmörkuð fjárráð og kunni þess utan ekki staf í portúgölsku.

„Ég hef ekki verið í skóla síðan ég var 14 ára. Að berjast hefur alltaf verið mín vinna. Það var hræðilega erfitt fyrir mig að koma fyrst til Brasilíu. Ég skildi engan og menningin allt önnur. Ég beit á jaxlinn og setti mér það markmið að læra tungumálið og verða besti bardagamaðurinn í Brasilíu,“ sagði Till en í Brasilíu lærði hann blandaðar bardagalistir eða MMA.

„Ég kunni alltaf að kýla en glíman var engin hjá mér. Ég lagði mikið á mig og var farinn að vinna menn með svarta beltið í gólfinu áður en ég vissi af. Eftir erfiða tvo mánuði í Brasilíu varð allt auðveldara og í dag lít ég á Brasilíu sem mitt annað heimili.“

Skildi dóttur sína eftir í Brasilíu

Jólin 2016 tók Till svo þá erfiðu ákvörðun að snúa aftur til Liverpool. Aftur til Heron sem ætlaði að hjálpa honum að verða að fullkomnum bardagamanni. Það sem gerði þá ákvörðun erfiða var sú staðreynd að Till var búinn að eignast dóttur sem hann þurfti að skilja eftir.

„Það var mjög erfitt að fara frá henni því hún er ljósið mitt. Þetta er önnur hindrun í mínu lífi sem ég þarf að komast yfir. Ég er að gera þetta fyrir hana og móður hennar því ég vil að við eigum gott líf,“ segir Till.

„Ég veit að dóttir mín mun fylgjast með mér í sjónvarpinu er ég fer að fá góða peninga frá UFC. Það mun gera þessa fórn þess virði.“

Till barðist sinn fyrsta bardaga hjá UFC í maí árið 2015. Eftir sinn annan bardaga í október sama ár þá meiddist hann alvarlega á öxl og var frá í tæp tvö ár. Hann snéri svo aftur í maí á síðasta ári. Náði þremur bardögum í UFC og vann þá alla. Sá síðasti gegn Cowboy. Bardaginn sem skaut honum upp á stjörnuhimininn.

Till er búinn með 17 bardaga á ferlinum og hefur unnið 16 af þeim. Einn endaði með jafntefli. Það var annar bardaginn hans hjá UFC. Hann er því eðlilega með sjálfstraustið í botni og trúir því að hann geti farið alla leið hjá UFC.