Sækja sér frekari gögn vegna sjókvía Arnarlax

Kristín Linda Árnadóttir, forstjóri Umhverfisstofnunar (UST), gagnrýnir að stofnuninni hafi ekki borist erindi um tvö aðskilin óhöpp hjá Arnarlaxi sem áttu sér stað fyrir rúmri viku. Matvælastofnun (MAST), sem hefur eftirlitshlutverk með búnaði í fiskeldi hér á landi, barst hins vegar tilkynning frá fyrirtækinu þann 12. febrúar, um skemmd á sjókví í Tálknafirði og um að gat hefði komið á sjókví í Arnarfirði, en MAST hefur enn ekki tekið út kvíarnar sem um ræðir líkt og blaðið greindi frá í gær.

Upplýsingafulltrúi MAST tjáði Fréttablaðinu í gær að regluleg samskipti hafi verið milli stofnunarinnar og Arnarlax eftir að slysin voru tilkynnt. Fréttablaðið aflaði þeirra gagna sem fóru milli fyrirtækisins og MAST frá þeim degi til dagsins í gær. Einungis tveir tölvupóstar fundust frá Arnarlaxi um skýringar fyrirtækisins og tvö minnisblöð starfsmanns MAST um málið. Engin samskipti hafa farið fram frá 13. febrúar. Engar myndir hafa verið sendar MAST og því hefur stofnunin ekki getað glöggvað sig á aðstæðum eða hversu mikið umrædd kví sökk, eða seig eftir tilvikum, í Tálknafirði.

Kristín Linda hefur komið því á framfæri að hún vilji að tilkynningar á borð við þær sem MAST fékk frá Arnarlaxi komi inn á hennar borð. „Það sé þá okkar að meta hvort mengunarhætta sé til staðar,“ útskýrir Kristín, en mengunarslys er skylt að tilkynna til UST. Hún gagnrýnir að stofnunin hafi ekki verið upplýst um stöðu mála fyrr en segist þegar hafa kallað eftir frekari upplýsingum.

Sjá einnig: MAST ekki enn tekið út kvíar Arnarlax

Upplýsingafulltrúi UST, Björn Þorláksson, spyr sig af hverju atvikið hafi ekki verið tilkynnt til stofnunarinnar, í ljósi þess að það mátti finna göt á annarri kvínni. „Ef þetta atvik hefði komið upp í kví í Faxaflóa þá mætti spyrja sig hvort viðbrögð, aðhald og eftirfylgni yrði með markvissari hætti.“

Landssamband veiðifélaga óskaði eftir því við sjávarútvegsráðherra í gær að gerð yrði stjórnsýsluúttekt á eftirliti þeirra stofnana sem lögum samkvæmt hafa eftirlit með sjókvíaeldi.

Guðni Magnús Eiríksson, sviðsstjóri lax- og silungsveiðisviðs Fiskistofu, segir Fiskistofu aðeins koma að málinu þegar fiskur hefur sloppið úr eldisstöð og stjórni þá veiðum á honum. „Við höfum ekki grundvöll til annars en að tilkynning Arnarlax sé rétt nema ef eftirlit Matvælastofnunar leiðir annað í ljós, þá myndum við kalla eftir því að viðbragðsáætlun sé virkjuð. Aðkoma Fiskistofu er háð þeim upplýsingum sem við fáum frá rekstraraðilum, þar sem við höfum enga eftirlitsmenn sem sinna þessu eftirliti. Það er alfarið hjá Matvælastofnun.“

Ekki náðist í Víking Gunnarsson, framkvæmdastjóra Arnarlax, þrátt fyrir ítrekaðar tilraunir annan daginn í röð. Fram kom í gær að fyrirtækið hefði kallað eftir úttekt óháðrar stofnunar á atviki þegar sjókví varð fyrir skemmdum fyrr í mánuðinum. Fyrirtækið segir engan lax hafa sloppið.