Bílastæðin í Keflavík að fyllast

Isavia gerir ráð fyrir því að bílastæði við Keflavíkurflugvöll muni fyllast um páskana líkt og gerðist á sama tíma fyrir ári síðan. Þetta kemur fram á heimasíðu Isavia. Guðjón Helgason, upplýsingafulltrúi Isavia, sagði Mbl.is í dag að þau stæðu sem væru eftir þyrfti að bóka á netinu.

Isavia hefur kynnt bókunarkerfi á vef Keflavíkurflugvallar þar sem farþegar geta bókað bílastæði fram í tímann. Hvetur Isavia farþega til að bóka bílastæði við flugvöllinn fyrir brottför til að forðast það að fá ekki bílastæði við komu. 

Hægt er að fá bílastæðin á betri kjörum en þegar greitt er við hlið.

„Bókunarkerfinu var hleypt af stokkunum í febrúar og er liður í því að koma í veg fyrir að stæðin fyllist á álagstímum á flugvellinum. Lægsta sólarhringsverð yfir páskana er nú 990 krónur og því fyrr sem bókað er, því lægra verð fæst. Verð á sólarhring fyrir þá sem ekki bóka stæði og greiða við hlið er 1.750 krónur,“ segir á vef Isavia.