Egill tapaði máli fyrir Mannréttindadómstólnum

Egill Einarsson, betur þekktur sem Gillzenegger, tapaði í morgun máli gegn íslenska ríkinu fyrir Mannréttindadómstól Evrópu. Egill höfðaði meiðyrðamál gegn Sunnu Ben Guðrúnardóttur sem sakaði hann á Facebook um að vera nauðgari.

Forsaga málsins er sú að átján ára stúlka tilkynnti lögreglu að Egill og unnusta hans hefðu nauðgað sér. Í janúar 2012 tilkynnti önnur kona til lögreglu að Egill hefði brotið kynferðislega á sér nokkrum árum fyrr. Báðum málum var vísað frá vegna skorts á sönnunargögnum.

Hinu síðara 15. nóvember 2012 og viku síðar fór Egill í viðtal í Monitor, fylgirit Morgunblaðsins, þar sem hann ræddi ásakanirnar. Sagðist hann meðal annars frekar vilja fá heilahimnubólgu en að vera kærður fyrir nauðgun.

Mikil reiði braust út vegna viðtalsins og var meðal annars stofnað til síðu á Facebook, „Gillz af forsíðunni - krefjum Monitor um afsökunarbeiðni“, þar sem birtingu þess var mótmælt. Þar lét Sunna umælin falla þar sem Egill var sakaður um að vera nauðgari.

Egill stefndi Sunnu og vann málið bæði í héraði og Hæstarétti þar sem ummælin voru dæmd dauð og ómerk. Hann var þó ekki fullkomlega sáttur við niðurstöðu dómsins en hann fékk ekki miskabætur eins og hann hafði krafist og sat uppi með að þurfa að greiða málskostnað.

Mannréttindadómstóllinn taldi dómana í héraði og Hæstarétti ekki hafa brotið gegn Agli og dæmdi honum í óhag.

Ekki sannað að ummælin hefðu verið gegn betri vitund

Í dómi Hæstaréttar sagði að það færi ekki á milli mála að Sunna hefði sakað Egil um nauðgun með því að skrifa að ekki væri um að ræða „árás á mann fyrir að segja eitthvað rangt, heldur fyrir að nauðga unglingsstúlku“ og gagnrýna mætti að „nauðgarar“ prýddu forsíður rita sem dreift væri um allan bæ.

Hæstiréttur taldi þó ekki sannað að Sunna  hefði sakað Egil um nauðgun gegn betri vitund, það er að hún hafi vitað að málin gegn honum hefðu verið felld niður.

„Skilja verður málatilbúnað gagnáfrýjanda á þann veg að hún telji sig hafa haft ástæðu til að ætla, í ljósi þess hatursáróðurs sem hún kveður aðaláfrýjanda hafa staðið fyrir gegn ýmsum hópum, svo sem konum, að hann hafi gerst sekur um það brot gegn A sem hann hafði verið kærður fyrir,“ segir í dómsorðum Hæstaréttar.

Þurfti ekki að birta dómsniðurstöðu í fjölmiðlum

Egill krafðist einnar milljónar króna í miskabætur. Héraðsdómur dæmdi Agli engar bætur. Í niðurstöðu héraðsdóms sagði meðal annars, þegar útskýrt var hvers vegna Egill fengi ekki miskabætur, að ummælin hefðu aðeins birst á Facebook-síðunni „Gillz af forsíðunni - krefjum Monitor um afsökunarbeiðni.“ í bland við hundruð eða þúsund önnur ummæli. Þá hefðu þau verið fjarlægð þegar óskað var eftir því.

Hæstiréttur klofnaði í málinu. Einn dómari taldi hann eiga rétt á 200 þúsund krónum auk málskostnaðar. Dómurinn féllst ekki á kröfu Egils að konan þyrfti að standa undir kostnaði við að birta dómsniðurstöðuna í íslenskum fjölmiðlum.

Fór Egill með málið fyrir Mannréttindadómstól Evrópu og taldi að með dómi Hæstaréttar hefði íslenska ríkið brotið gegn sér, hvað varðaði rétt hans til friðhelgi einkalífs. 

Mannréttindadómstóllinn kvað upp dóm sinn í morgun. Taldi dómurinn að íslenska ríkið hefði ekki brotið áttundu grein sáttmálans með dómi Hæstaréttar. Í ljósi þess að íslenskir dómstólar hefðu ekki að fullu tekið undir umkvörtunarefni Egils þá ætti hann ekki ótvíræðan rétt á að fá málskostnað greiddan frekar en miskabætur.

Vann mál fyrir dómstólnum í nóvember

Egill vann í nóvember síðastliðnum mál gegn íslenska ríkinu fyrir dómstólnum. Þar komst Mannréttindadómstóllinn að þeirri niðurstöðu að dómur Hæstaréttar í máli Egils gegn Inga Kristjáni Sigurmarssyni hefði verið brot á áttundu grein mannréttindasáttmálans sem segir að sérhver maður eigi rétt á friðhelgi til einkalífs. 

Ingi Kristján hafði birt mynd á Instagram síðu sinni af Agli og skrifað við hana „Fuck you rapist bastard“ eða „„Farðu til fjandans nauðgaraskepna“.